Faltando poco pa aña caba, e preocupacion di Partido AVP ta grandi. Recientemente Gobierno a infroma cu cierto leynan mester pasa prome cu e fecha di prome di januari pa asina evita di bay riba lista preto di OACD y FATF pero te cu e dia di awe Parlamento no a ricibi ningun ley cu ta regarda esaki, asina Parlamentario mr. drs. Richard Arends a informa diahuebs mainta durante conferencia di prensa semanal di AVP na Cas di Partido.
Tampoco Parlamento tin bista riba leynan fiscal cu mester drenta na vigor dia prome di januari y cu ta parti di e reforma fiscal, como tambe base di entradanan pa presupuesto.
Nos ta bay drenta un aña 2020 cu hopi incertidumbre pa locual ta trata e consumidor, pero tambe comercio y inversionistanan. Un banda a presenta algun cifra di presupuesto 2020, cu despues a resulta cu no ta klop, pero en todo caso por a constata un movimiento grandi di impuesto directo pa impuestonan indirecto cu ta rekeri introduccion di leynan nobo.
Parlamentario Richard Arends a indica e siguiente fase di e reforma fiscal ta contene cambio den 13 ley y nada di esaki a yega Parlamento ainda. Hecho ta cu presupuesto 2020 lo keda trata den e aña venidero, esey caba a keda indica pa gobierno. Pero pa cumpli cu locual a presupuesta como entrada siguramente e leynan cu ta regarda reforma fiscal mester drenta na vigor prome di januari 2020. Mientrastanto cu te dia di awe Parlamento no a ricibi nada y no tin niun idea kico lo wordo presenta.
Locual cu por a wak den pasado caba cu prome cu pasco ta core introduci un crisisheffing y cu tur e concecuencianan cu e ta trece hustamente pa motibo cu e materia no ta wordo scrutina di e manera debido. Ni tampoco ta tene cuenta cu e efectonan pa cu comercio y cartera di pueblo. E manera di goberna aki ta categorisa tambe falta di direccion y decision cu ta e reseta pa drenta un aña cu incertidumbre riba tereno di impuesto y gasto di hasi negoshi.
Por a tuma nota di gruponan di comerciantenan ta lanta y vocifera nan malcontento pa e aumento riba e costo di haci negoshi pero tambe riba e incertidumbre cu ta reina den e planan di gobierno. No tin nada cu por destablisa un economia, sigur pa loke ta trata crecemento economico, ta ora cu e inversionista, e comerciante, e profesional independiente, e empresa mediano y chikito no sa kico ta spera pa locual ta trata impuesto pa e aña venidero.
Banco Central di su banda a indica cu crecemento economico a bira negativo na 2019 y keda casi flat den 2020. E incertidumbre ta wordo demostra tambe cu e perspectivanan negativo pa crecemento economico otro aña: inversionan di Gabinete anterior ja no tin efecto riba nos economia y consumo a baha drasticamente pa motibo di aumento di impuesto.
Gobierno tin e obligacion di trese confiansa como tambe brinda oportunidad. Como Gobierno bo tin e responsabilidad pa percura pa un competencia husto, pa percura pa comerciantenan por haci negoshi na un manera husto, percura pa e ciudadano consumidor haya un miho producto pa un miho prijs pero mas bien tur locual a mira te awo ta intencion, pero te ainda nada di accion concreto pa logra esaki.
