Ricardo Croes, lider di RED, a probecha durante di e evento cultural cu a tuma luga ayera nochi riba Plaza Betico Croes, pa expresa algun palabra di felicitacion y tambe elogio na e ministernan cu a huramenta ayera. El a splica cu e confiansa cu a wordo poni den nan, a wordo poni door di pueblo. Esaki tin un motibo cardinal. E motibo ta cu pueblo kier a mira un cambio. Historia a mustra nos cu Gobierno di un pais ta responsabel, no solamente pa e logronan di e pais. E ta responsabel pa e fayonan tambe. Historia a mustra nos tambe cu Pueblo ta cansa di fayo y kier un cambio.
Esaki ta e cambio. E cambio cu pueblo a scoge. Sigur e ta un dia historia. E ta historico pa partido RED, cual Croes a comparti cu e publico.
Na 2005, Partido RED Democratico a participa na eleccion pa prome biaha y dr. Rudy Lampe, a haya su prome asiento den parlamento di Aruba. Pa 4 aña el a traha fervientemente. Na 2009, partido RED Democratico, no tabata tin e mesun suerte y na 2013, Ricardo Croes a wordo acerca pa dr. Lampe cu e mes no a mira kico a mira den dje. Pero Croes a para dilanti tur hende diabierna riba Plaza Betico Croes, ta duna un discurso.
Dr. Lampe nunca a rindi. 2013 no tabata un aña pa partido RED atrobe. Es mas, a core un campaña y e temanan tabata hopi controversial. Holo cu nan tabata den boca di hende. Pero e aña aki tabata den boca di tur politico. Di tur partido, incluyendo oposicion. A resulta cu RED ta berdad nan ta papia, segun Ricardo Croes, lider di e partido. Y berdad nunca ta muri. Croes a gradici diabierna anochi Rudy Lampe pa e confiansa cu el a pone den Croes. Pa e aña aki a lidera su baby, RED Democratico. Cu confiansa di pueblo, el a haci un bon trabao. Cu confiansa di pueblo, e tabata para dilanti di pueblo y lo bay haci un tremendo trabao den e siguiente 4 añanan den Parlamento.
Croes a disfruta durante di e evento un cancion cu yama “Arubiano mi ta”. Croes ta orguyoso di su isla tambe. Su sanger ta sanger Arubiano y e ta orguyoso di su sanger tambe. Su lenga ta Papiamento, ta di Aruba e ta. E ta orguyoso di su lenga tambe. E ta orguyoso di pueblo henter.
Ricardo Croes a gradici tambe su casa, su cinco yiunan. Sin nan, Ricardo Croes no ta ken e ta awe. Nos no ta ken nos ta sin nos mama. E sosten cu el a ricibi durante e campaña aki ta incalculabel. Fuera di a gradici su suegra y tambe un bon amistad di dje, el a gradici su coleganan di RED Democratico pa nan confiansa den su persona pa lidera e partido e aña aki.
Tambe el a gradici tur hende cu den un manera directo of indirecto, cu a mustra su cara of no a mustra su cara, pero a sostene partido RED Democratico.
Ricardo Croes a gradici tambe sra. Prome Minister mr. Evelyn Wever-Croes. E ta sinti su mes masha orguyoso di tin un lider hende muhe. Ta confia cu un hende muhe sa kico e ta haci, miho cu un hende homber, el a comenta. Tambe el a gradici e vice-prome minister, Otmar Oduber. Nan tres, Ricardo Croes, Evelyn Wever-Croes y Otmar Oduber, a konkel cabes un tiki. A combersa masha ameno mes cu otro. Tur combersacion entre nan tres tabata agradabel y a sinti cu nan ta birando brother y sister caba y asina mester ta, si bo kier mira un coalicion solido. Por ultimo el a desea e ministernan sabiduria, pasenshi forsa. Na su coleganan den parlamento cu a huramenta diabierna tambe, Let’s Do this.
