Tin un desaroyo cu siman pasa Ricardo Croes a pone algo riba Facebook, unda cu el a dirigi su mes na Prome Minister, Minister Glenbert Croes y otro coleganan den Parlamento pa loke ta e desaroyo, e atakenan constantemente, trocemento di palabra referente situacion y posicion di Gobierno, di dr. Rudy Lampe, referente e situacion di enseñansa.
T’asina, segun e parlamentario, e mes a haci declaracion den rueda di prensa caminda cu el a splica claramente, na placa chikito, cu ta su persona a trece e solucion aki den Rijksminister Raad.
Pa por adresa di biaha loke cu Hendrik Tevreden tambe a bisa, kende a referi na e articulo cu Croes a pone den noticia, e ta bisa cu e no a pone ningun articulo. Nan a copie for di su pagina di Facebook. E motibo cu el a adresa Tevreden pasobra nan a sostene Parlamentario Edgard Vrolijk.
Den e declaracion aki, tin cu compronde cu entre otro, Minister Glenbert Croes a contesta riba un chat cu ora cu a haci’e e pregunta cu si a kita of no TraiMerdia for di Minister Lampe, el a contesta cu si.
Esey ta algo fiha, preto riba blanco y a base di esaki el a cuestiona esey. Minister Glenbert Croes a bin dilanti y a bisa cu pa evita cu ta troce su palabra of compronde malo, cu ta dr. Lampe a bin cu e solucionnan. Pa e motibo aki Croes a gradici’e y tambe a pone riba su pagina di Facebook.
Palabra tin poder, Croes ta enfatisa. Palabra bo ta uz’e pa educa hende, declara guera, manipula. Duna informacion corecto. Palabra tin hopi poder, e ta ripiti. Politiconan sa esey bon bon tambe. Papia e cos manera cu e ta. No ta Glenbert Croes so a haci su mes culpabel na esaki. “Corda cu den Parlamento, coleganan di coalicion ta nada menos cu 11. MEP tin 9, RED ta 1 so. Ora cu Croes ta reacciona como Parlamentario, di repente ta un problema. Pero durante mas cu un aña minister di RED ta wordo bombardea. Esey no tabata ningun problema. A sinta trankil deal cun’e. Pero asina cu e Parlamentario di RED haci un reclamo, di biaha e ta sali den prensa cu tin problema den coalicion.
Por corda cu na december tambe tabata tin problema den coalicion? Coalicion tey keto bay. Tur actitud incorecto mester ta exponi, Croes a remarca.
