Riba KLM: Ocho ex-pashent di Coronavirus a yega Aruba diasabra

Nan no tin Coronavirus mas, pero nan test na Aeropuerto diasabra atardi a mustra claramente cu nan tabatin e virus di Covid-19 den nan sistema. Cu e realidad aki Aruba a siña algo nobo…cu den un solo vuelo asina Bo por haya 8 caso activo tambe, pues ta subraya e necesidad pa tin control efectivo na yegada y cu por produci resultado rapido pa evita contagio riba nos isla. E cantidad di 8 ex-pashentnan aki no ta bay riba e lista di 103 caso positivo, pasobra no ta considera nan casonan di Aruba y nan no tabata contagia mientras ta riba nos isla.

Ken e 8 ex-pashentnan cu a yega nos isla ta, ainda no ta conoci. Nos a compronde cu mayoria di e pasaheronan tabata Arubiano si y cu un porcentahe halto di studiantenan cu a regresa nos isla, sea nan a caba cu nan estudio of pa vakantie. Dor cu nan no ta portado di e virus mas tampoco, no ta necesario pa bay aplica “contact tracing” manera ta haci cu casonan activo. Esey ta pa verifica kendenan tur tabata riba e vuelo, cu ken nan a papia, tabatin contacto fisico of den cercania. Tur e hendenan ey lo por bay den cuarentena pa dos siman largo, djis pa siguridad. Pero como cu e grupo aki awo ta considera “zwak positief” a opta pa laga nan den cuarentena tres dia so y desde dia 1 di juli cuarentena ta caba.

Sala di espera na Aeropuerto di Aruba, obviamente lo no por sinta mas riba tur stoel. Esey ta pa mantene distanciamento social entre pasaheronan saliendo for di nos isla pa subi avion. Esaki ta por lo menos un di e medidanan di precaucion cu Aeropuerto ta tumando pa evita mucho contacto entre pasaheronan.

E “bon noticia” den esaki ta cu e 8 ex-pashentnan aki awor lo por sirbi pa duna “antibody” cu por uza riba pashentnan activo. Ya den e 103 casonan positivo cu nos isla a raporta, un cantidad di nan boluntariamente a ofrece pa duna antibody na Laboratorio Nacional na Hospital pa uza den caso si bin pashentnan nobo. Dr. Chaudry e tempo ey a papia di uza e formula aki riba pashentnan cu ta hopi malo den cuido intensivo. Internacionalmente a deduci cu uzo di antibody di ex-pashentnan lo por yuda pashentnan activo pa, den tempo acelera, cura di e virus aki, cu hopi biaha ta trece otro complicacionnan pa e pashent.

Hacimento di pregunta, un rato pasa, na yegada di pasaheronan na Aruba. Tur pasahero cu yega nos isla mester pasa un control prome cu yega na Migracion. Nan mester contesta preguntanan, ta check nan temperatura y verifica si tin sintoma. Den algun caso ta haci test na Aeropuerto mes tambe.

Tocante testnan di Antibody

E testnan cu ta haci na Aruba generalmente ta asina riguroso y preciso cu ta haya mas informacion di locual hopi biaha mester. E pruebanan ta hasta bisa Bo si Bo tabatin e virus den pasado. Pa haci testnan di antibody mester tuma sanger di e pashent y e resultado lo indica si e pashent tabatin e virus cu ta causa Covid-19. Antibody ta proteinanan cu ta yuda bringa e infeccion y por provee proteccion pa evita cu ta contagia atrobe, pues ta haci Bo immuun. Ta bon pa informa cu e test di antibody no ta relevante cu si Bo ta infecta awo of no. Ta tuma entre 1 pa 3 siman despues di e infeccion, pa Bo curpa por produci antibody. Por ta asina cu un hende por test positivo pa antibody sin cu nunca tabatin sintoma di Covid-19, ta considera e ora cu Bo tabatin “asymptomatic infection”, pues sin ningun sintoma y sin bira malo mes!

Separa di Laboratorio Nacional, awendia laboratorionan priva tambe por haci test pa verifica si e persona tabatin Coronavirus den pasado sin cu e sa y cu e ta portado di antibody cu lo yud’e awo pa no contagia di nobo y cu e por yuda otro si acaso nan infecta cu e virus.

Hopi test e ultimo siman aki

Den e ultimo dianan aki e seccion specialisa pa conduci e testnan di Covid-19 di Departamento di Salud Publico (DVG) tin nan mannan yen pa test tur e grupo cu ta den cuarentena. Ta trata aki di riba 220 persona cu a yega nos isla for di un otro pais cu tin casonan activo di Coronavirus. E grupo aki, aunke no tin sintoma, mester a bay dos siman den cuarentena. E periodo ey ta caba mañan y como tal dia 1 di juli e cantidad di hendenan den cuarentena lo baha drasticamente. Prome cu declara nan “liber” pa mobilisa riba nos isla, a test tur di nobo atrobe y esey ta tuma su tempo.