Aruba e aña aki su clima ta uno basta calor. A cuminsa sinti e aire calor for di tempran, loke normalmente ta yega te den lunanan di augustus y september. Pero e cifranan di clima e aña’ki ta diferente cu otro añanan.

For di mainta tempo a habri nubla y awa cayendo den diferente bario di Aruba, pero e tempo por a nota claramente tabata colga den e parti panort di Aruba. Y na momento cu e yobida a cuminsa, esaki a bini di panort cu e biento fuerte pushando e yobida direccion pazuid.

Datonan ricibi for di Servicio Meteorologico ta mustra cu e cantidad di yobida den e prome cuater lunanan di aña tabata: Januari, 2 mm; februari 2 mm; maart 0.6 mm y april 0.8 mm. Pa un total di 5.4 mm den e prome cuatro lunanan di aña, mientras cu den 2018 den e prome cuatro lunanan a haya 89.0 mm di awa cu a cay.

E yobida fuerte di dialuna a registra 4.4 mm riba e prome dia di luna di juli, cu ta hopi mas cu tur e lunanan di e aña’ki. El a percura pa inundacion na algun sitio na Playa, pero tambe un problema den trafico, pasobra e visibilidad na momento di e yobida mas fuerte, cu tabata un poco despues di 1’or di merdia, tabata malisimo y a causa diferente accidente chikito.

Pero tambe pa e parti aereo tabatin problema. Tabatin tres avion cu a confronta problema cu visibilidad. Nan no tabata mira e pista y mester a dal algun buelta pa tempo pasa.

Meteo a saca su boletin di pronostico cu ta valido te cu dia 2 di juli, pa 5’or di atardi. Meteo a informa cu den oranan di anochi e tempo lo ta parcialmente nubla cu un awacero pasahero; den madruga y diamars mainta e tempo ta parcialmente te hopi nubla cu naturalmente ta trece e chens di yobida local. Tin chens di yobida di te cu 5.5 mm.

Un ola tropical lo pasa den nos region durante proximo 24 ora treciendo mas humedad y instabilidad den atmosfera. Esaki lo por produci algun awasero local cu un posibilidad chikito di lamper cu strena. di otro un banda, stof fini suspende den aire lo obstaculisa e visibilidad un poco durante proximo dianan.

Olanan di lama lo ta for di direccion oost cu haltura di 5 te 8 pia. Pa e motibo aki ta pidi tripulantenan di boto chikito pa tene cautela riba lama habri, specialmente na parti oost te noordwest di costa.

Na mesun momento Meteo ta informa cu riba 2 di juli tin un eclipse total di Solo cu no ta visibel na Aruba.

Comments

comments