Den e ultimo nuebe lunanan seccion ‘Jongerenloket’ bou di auspicio di Social Crisis Plan na Departamento di Asunto Social a ehecuta exitosamente e proyecto piloto yama “Riba Caminda pa Trabou”.

E proyecto a enfoca riba e grupo mamanan soltera den bijstand entre 18 cu 30 aña, cu tin un ‘gap’ grandi pa subi mercado laboral.

Meta principal di e proyecto piloto ta pa hisa e participacion den mercado laboral di hobennan den bijstand door di ofrece diferente trayecto, intermediacion y guia personalisa pa asina e hobennan por yega na un trabou satisfactorio y ta financieramente stabiel pa nan y nan famia.

E proyecto piloto a toca temanan pa e hobennan haya propio conocemento, motivacion interno y descubri nan propio potencial pa asina promove desaroyo personal. Tambe e participantenan a haya training individualisa pa siña tur aspecto pa por solicita exitosamente pa trabou. Por ultimo e grupo a completa curso di computer na Enseñansa pa Empleo unda 95% di e participantenan a obtene nan certificado. ‘Jongerenloket’ a traha conhuntamente cu varios partner y departamento pa por brinda e hobennan trayectonan specificamente diseña pa nan.

Durante e proyecto por a nota cambio y mira con cada curso, charla a contribui na e crecemento propio. Cu e sosten di e programa den su totalidad a activa e grupo su motivacion interno pa asina nan mira e importancia pa inverti den nan mes.

E grupo di mamanan soltera tin un futuro prometedor mirando cu ya caba nan ta hayando ofertanan pa trabou y ta logrando di yega nan meta por ehempel caba nan scol exitosamente. Participantenan a vocifera di ta cla y motiva pa subi mercado laboral.

‘Jongerenloket’ kier a gradici tur persona y departamento cu a haci e proyecto piloto exitoso.
Pa mas informacion of pregunta por tuma contacto cu ‘jongerenloket’ na Departamento di Asunto Social na telefon 528-1100.

Comments

comments