Reunion historico den Parlamento: Sea ta para pa corupcion of confiansa!

Si e keda cla cu KLM, cu ta buscando cupo riba e vuelo di diahuebs mainta, anto e ora ey Minister Marisol Lopez-Tromp lo ta riba avion rumbo pa Aruba pa por atende na e reunion publico di Parlamento diabierna awo. Esey lo bira un reunion historico! Pasobra lo ta pa prome biaha cu ta baha un Minister na mando via un mocion di desconfiansa y lo ta prome biaha tambe cu un Minister lo expone corupcion den dia cla tumando luga cu tereno y otro asuntonan, cu sin duda lo compromete integridad di henter Gabinete Wever-Croes. Parlamentarionan lo mester opta pa sea defende corupcion of confiansa. E lo bira un reunion estilo “un pa tera un pa lama”.

Pa evita cu nan mester papia y menciona e motibonan dicon nan tin desconfiansa den Minister Lopez, e tres fraccionnan di MEP, POR y RED a pidi Presidente di Parlamento un reunion urgente pa den forma di “hammerstuk” pasa e mocion aki, sin cu mester vota y sin cu mester hustifica nan decision. E reunion ta programa pa diabierna awo pa 8:00am den sala di Parlamento di Aruba. Aunke e ta publico, portanan lo ta cera pa publico y pa prensa, solamente lo por sigui e reunion via rednan social, radio y television. E fraccionnan ta planea pa haci esaki

Locual cu e tres fraccionnan di MEP, POR y RED no a conta cu ne, ta e hecho cu e mesun Minister lo ta presenta probablemente pa scucha kico nan tin contra dje pa e defende su mes. Probablemente e Parlamentarionan aki no a conta cu e lo por tene un discurso di oranan largo, pa repasa documento pa documento, tereno pa tereno y contract pa contract, cu el a topa cu ne ora el a asumi e funcion di Minister. Entre nan tin contract di coordinadornan cu nunca a presenta na oficina. Un di nan ta hasta bibando na Colombia pero ta cobra tur fin di luna na Aruba!

A bin topa cu terenonan comprometedor cu a bay laga atras, manera ta tereno grandi banda di Santana di Cacho (cerca di Baby Beach) pa un ambtenaar yega na Gobierno. A bin topa cu corupcion pisa den DIP cu tereno comercial, cu tereno huurgrond, a bin haya corupcion grandi den Serlimar y asina por sigui menciona. A bin topa cu un DOW totalmente demotiva pa decisionnan robes cu a tuma luga. Un di nan ta un proyecto miyonario cu ta tumando luga awendia na Guarda nos Costa cu containernan bieu cu a cumpra/huur, cu diferente conseho negativo di DOW, pero cu toch Gobierno a opta pa sigui cu ne, marando Gobierno na contractnan contra ley y contra maneho di DWJZ, den cual Gobierno ta mara su mes sin por sali di e contract nunca mas! Un sin fin di decision cu e Minister sea ta acepta y ta bira complice di e consecuencia, of ta para nan y denuncia nan pa ta na e banda corecto di bon gobernacion.

Un otro caso cu ta saliendo mas y mas awor riba superficie ta terenonan huurgrond cu a bay completamente robes ultimo tempo. Un di nan sin duda ta pertenece na e sospechoso di husticia Mericano, Roberto Rincon. Pero, pio ainda…su representante legal na Aruba parce ta ex-Presidente di Partido MEP. Ta e tipo di asuntonan asina mester keda scondi, mester ta tapa pa publico y pa na un forma discreto, pasa terenonan prominente di nos pais pa gruponan yega na Ministernan of politiconan na mando.

No ta tur e decisionnan cu ta hole na corupcion a bin di ex-Minister Otmar Oduber, pasobra e ta un sospechoso di husticia caba. E no por bira un sospechoso dos biaha, solamente e caso contra dje por bira mas pisa. E locual ta mas lamentabel ta cu despues cu Oduber a baha, ta e ora e “fiesta” a cuminsa mes, pero e ora ey como “consultant” hayando cooperacion di coleganan Minister of di ambtenaarnan den departamentonan di Gobierno cu tambe awor ta envolvi den e actonan di corupcion aki. Ministernan cu a pone nan firma bou di MB nan cu tin conseho negativo di Raad van Advies y di Departamento Huridico di Gobierno of di DOW, pero cu toch a opta pa sigui cu nan contra tur conseho y maneho existente. Pero, kisas e Parlamentarionan cu ta sostene gobierno no ta cla pa e combersacion aki.