Trahadonan di Post N.V. a tene dialuna un demostracion y a mustra nan mal contento. Directiva di Post N.V. a sinta cu sindicato STA y a haya un bon comprension cu otro. P’esey diahuebs nan ta bay reuni cu e trahadonan y busca un solucion.
E problema no tabata hopi grandi y Guillermo Raymond, Director di Post N.V., ta di pensamento cu nan mester sinta y papia kico a pasa. Asina ey busca un solucion y ehecuta. A papia riba e topico di kita dos hende di trabou y busca otro, unda nan ta sinti comodo cu ne, pero na un acuerdo cu lo sinta cu e trahadonan pa papia di e problema y busca solucion.
Segun e director, di loke a sali over kita hende, esey ta rumornan pasobra te ainda gobierno no a bisa nada. Pero otro siman diamars nan ta bay tin un reunion cu minister Chris Romero y su team. Rond mundo post a cay cu 30% p’esey tin di bay tuma decisionnan.
Diego de Cuba, Presidente di STA, a splica cu e reunion a bay den bon ambiente y e situacion di Post N.V. no ta mucho di gaba. A palabra pa atende mas pronto posibel e problematica di e sentimento di trahadonan di e trato cu nan ta ricibi di cierto persona na trabou. A palabra cu lo reuni y e persona encuestion lo reuni cu e grupo di trahado di teller p’e grupo di trahado discuta enfrenta e personanan. Aki nan lo mester papia riba kico ta e problemanan.
Den e reunion aki e gerencia a trece e situacion financiero cu e compania ta enfrenta. De Cuba a bisa cu e procesonan aki lo por haya den companianan aki na Aruba. Si kier scapa cantidad di cupo di trabou, mester reuni frecuente den e proximo dianan y luna. E crisis y pandemia ta leu di pasa, pasobra lo pasa 1 pa 2 aña den e situacion aki.