Docentenan miembro di sindicato SIMAR a reuni na Compleho Deportivo Frans Figaroa pa un reunion extraordinario riba e incertidumbre den enseñansa. Minister di Enseñansa a bin cu cambionan di cual e docentenan no ta di acuerdo. E docentenan a vocifera nan preocupacionnan cu e decision pa scolnan habri.
E sindicato ta contento di mira e acogida di docentenan cu a presenta na e reunion extraordinario aki, asina Josephina Albertus, presidente di SIMAR, a bisa. Ta mira entre e docentenan e inkietud, pero tambe esun cu tin eyfo. SIMAR a vocifera riba e importancia cu e docentenan ta bon informa pa ora dal un stap mas verder, y asina nan sa pakico nan ta haciendo esaki.
SIMAR tin alrededor di 400 miembro, pero a haci yamada p’e reunion pa tur docente sea nan ta miembro of no, segun Albertus. No ta importa cuanto miembro tin sea ta 1 of mas, pero nan merece e miho representacion. SIMAR ta haya importante cu ful veld sa kico ta pasando.
Desde cu COVID-19 a yega Aruba dia 13 maart, a cuminsa papia diferente cos. SIMAR kier duna informacion na e docentenan den un manera cronologico. Nan kier duna informacion desde 13 maart te cu awe kico tur a pasa den enseñansa, pero tambe e cambionan abrupto. Aruba ta den un crisis y hopi hende ta pensando riba diferente cosnan. A bin reuni cu e docentenan, p’asina splica nan unda a cuminsa, con cosnan ta y con lo sigui desde awo padilanti.
Pa e reunion aki e sindicato a apica e protocol di distancia social, pero tambe pa mantene e parti di higiena. Desde cu e virus a yega, e parti di higiena a bira hopi importante y esey nan a mustra door di haci e reunion na Compleho Deportivo Frans Figaroa, teniendo cuenta cu e distancia social. A percura cu e docentenan haya hand sanitizer, awa pa refresca, y den e tribuna por sinta na un distancia.
E miembronan kier un claridad riba e mandato, pero e sindicato a haci un encuesta preeliminario pa saca afo kico ta e pensamento di miembronan. Tur esaki nan lo trece dilanti na e miembronan pa asina nan tur hunto por uni y sigui bay dilanti. Enseñansa ta algo cu nan tur ta carga, segun Albertus. E sindicato a yama e reunion aki di urgencia pa haya e mandato di miembresia pa haya claridad riba diferente punto di preocupacion. Specialmente e incertidumbre pa loke ta Coronavirus, pero tambe e cambionan cu Minister di Enseñansa ta haciendo sin consulta cu e docentenan. Nan ta sinti cu e cambionan aki no ta na bienestar di enseñansa.
