Reto grandi pa bendedonan di cuminda riba ruta di carnaval

1509

Mientras cu algun dia pasa Departamento di Salid Publico hunto cu nan seccion di “Dienst warenkeuring y hygiene” a adverti cu tur esunnan cu lo bende of cushina cuminda riba ruta di carnaval, mester tin un “Gezondheidsverklaring” conoci como e “Carchi Berde”, ta resulta cu pa dos siman caba DVG no por entrega ningun carchi berde pasobra no por test ningun hende. Restaurantnan regular y tur esunnan cu tin intencion di bende cuminda canto di caminda durante paradanan di carnaval awor ta man na cabes cu e desaroyo negativo aki.

“Ta esaki ta e cosnan cu ta stanca nos economia. Bo kier bisa mi cu den pleno high season Gobierno por haci un joke asina? Ta mustra comosifuera ta pa malo ta haci e cosnan aki”, asina un comerciante rabia a expresa na 24ora.com awe mainta. Di un banda ta menasa cu multa of hasta cera restaurant, di otro banda e mesun instancia ta faya den brinda e servicio necesario.

Informacion cu nos a compila ta mustra cu e reto ta na Laboratorio Nacional, cu ta resorta bou di Dr. Horacio E. Oduber Hospitaal. Nan a laga material importante caba riba nan, probablemente dor di e hacking di nan sistema di computer, no a paga proovedornan di material medico.

E test ta encera cu tur empleado cu ta traha cu cuminda of bebida mester manda un “sample” di nan pupu pa un prueba na laboratorio. E material pa por haci e test aki, conoci como “faeces“ a caba na laboratorio y como tal no por test nada. DVG ta manda potchinan di pupu na cantidad ultimo dianan aki pa motibo di drukte di carnaval, pero tin tur warda den reki na laboratorio pasobra no tin e test necesario.

Comerciantenan ta spera cu awor cu Gobierno ta tumando maneho di Hospital over, cu awor por corigi tur e retonan aki. A nombra Ronnie van Trigt den gerencia di Hospital, cu intencion pa draai e fundacion mescos un negoshi. Tin hopi speransa cu esey lo trece cambio den maneho di e instituto. Di otro banda lo nombra un CFO nobo tambe, pa garantisa cu e fondonan di AZV ta drenta regularmente pa Hospital por cumpli cu su debenan na tempo.