Reto di idioma pa interoga sospechosonan di barco yena cu droga

6083

Tabata dia 25 di februari ultimo cu Warda Costa di Caribe Hulandes a intercepta e barco Aressa den nos awanan teriorial. E control a sosode den cuadro di e cooperacion cu Marina Real Colombiano. A decomisa no menos di 5.500 kilo di cocaina abordo, cu ta e hayazgo di droga mas grandi den historia di nos pais. Na tur a detene 11 sospechoso abordo di e barco, cu awor mester duna cuenta di e cargacion. Pero, e proceso di interogacion ta bayendo mas dificil di locual a pensa.

E sospechosonan envolvi den e cargacion grandi aki di droga ta procedente for di Croatia y Servia, pero tin nacionalidad di Montenegro. Nan idioma como tal no ta ni Ingles, ni Spaño, ni Hulandes y pio Papiamento. Consecuentemente mester haci uzo di traductornan huramenta pa interveni y duna husticia di Aruba un man den e proceso di interogacion. Claro cu e ta haci e trabou mas pisa y hasta complica.

E barco “Aressa” ta mara den waf di Paardenbaai di Oranjestad ainda. E no ta den beslag mas! Fiscal a lanta e beslag luna pasa y ta pendiente pa e agencia doño di dje bin busk’e pa hib’e su destino.

Parce cu ta for di basta tempo caba cu autoridadnan internacional tabatin wowo riba Aressa, cu ta conoci pa nabega den awanan internacional. Warda Costa di Aruba tambe tabatin atencion special pe y den coordinacion cu Ministerio Publico di Aruba y demas partnernan internacional, a dicidi di aborda e barco pa controla. E barco a sali for di Venezuela y tabata rumbo pa Grecia.

Ta bon pa enfatisa cu Warda Costa di Caribe Hulandes ta hopi mas activo ultimamente y tabata masha exitoso den su controlnan riba lama. Desde october 2019 pa awo, a decomisa no menos cu 7 mil kilo di cocaina riba lama, un berdadero record pa nos isla! Kisas esaki ta splica e rol cu Merca kier hunga awo den mas presencia y control contra trafico ilegal di droga den laman Caribense.

Aressa ta traha na aña 1978, pues tin 42 aña caba den operacion como un barco di carga. E tin un capacidad di 2649 ton DWT y ta midi 95 meter di largura y 13.22 meter di hanchura. Su “call sign” ta TJMC15.

For di Ministerio Publico nos a compronde cu tur 11 sospechoso ta den “gevangenhouding”, pues den e proceso Hues Comisario a prolonga nan detencion cu 60 dia, pues probablemente ta keda cera te dia cu nan caso yega dilanti Corte.