E decision a cay den reunion di Hunta di Directiva pa duna pakete di retiro na un cantidad di trahado. Esaki den cuadro di e situacion penoso cu Triple A ta pasa aden pa motibo di cierre di frontera cu a causa un perdida grandi di entrada. A traha un Crisis Recovery Plan den cual ta indica e necesidad cu ta existi pa reduci gastonan di personal den forma drastico.
Awe mainta via di un reunion via internet, un grupo di trahado a haya un splicacion, via di un video di plan di recuperacion cu aeropuerto ta bay cuminsa cu ne, esta e “Crisis Recovery Plan”. E plan di recuperacion aki ta nifica retiro di un cantidad grandi di personanan trahando directamente cu aeropuerto.
Na momento cu e informacion aki a sali, el a cay manera un baño di awa friu cerca e empleadonan. Nan ta sinti cu aeropuerto ta suficiente bon para financieramente cu nan por paga salario pa mas cu un año largo mientras cu ta cana e proceso di recuperacion. Ya caba algun dia pasa a pronostica un cierto cantidad di pasahero cu lo yega Aruba como turista y a resulta cu e cantidad cu a yega ta hopi mas di loke a pensa inicialmente.
Den e plan aki ta describi paso pa paso, e caminda cu lo cana pa yega na e cantidad di retironan nacional. Lo tuma un periodo pa splica e empleadonan kico e plan ta encera y con ta bay aplica esaki. E ta un proceso cu ta cana luna pa luna. Asina a cuminsa pa comunica e informacion na e empleadonan, ta discuti e plan cu sindicato STA y FTA y despues ta bini cu e programa di retiro boluntario.
Den e siguiente fase ta sigui cu e parti di combersacion individual cu e empleadonan. Esaki ta bay tuma luga e luna aki ainda y empleado ta haya informacion di e posibilidad pa haci uzo di un pakete di retiro boluntario.
Den luna di augustus ta cuminsa evaluacion tur e aplicacionnan pa retiro boluntario. Gerencia lo evalua e cantidad di personanan cu a pidi retiro boluntario pa mira si e ta suficiente. Den augustus ta sigui cu combersacion cu e sindicatonan.
E plan ta pa den luna di september informa di e structura nobo di Triple A. Esey ta momento cu lo haci un evaluacion di e cifranan disponibel te e momento ey. Lo informa e empleadonan e momento ey di e structura nobo di aeropuerto. E ultimo punto den september ta cu lo sinta atrobe cu e sindicatonan y sigui combersa. Den luna di october ta sigui cu e combersacion cu e empleadonan.
Empleadonan a mustra nan preocupacion, pasobra ta sinti cu tin otro alternativanan. Banda di esaki, nan ta preocupa tambe kico reduccion di trahado lo nifica riba e standardnan internacional cu Aruba mester cumpli cu nan. Si esaki lo tin efecto riba reputacion di aeropuerto di Aruba.
Awo nan ta spera pa sindicatonan haya tur informacion y combersa cu nan representante riba e tema aki. Nan ta duda si cu por yega na un areglo den apenas tres luna di tempo.
Aruba Airport Authority tabata trahando riba un proyecto grandi di ampliacion di e facilidadnan cu ta core te cu 2030 y ta encera un suma grandi cu a hinca como inversion. No ta conoci di ki forma esaki lo sigui.
