Recientemente empleado di Aruba Investment Bank, di inicial Y.C. a haya su retiro inmediato despues cu su doño di trabou a entama un caso civil contra dje. Corte a duna AIB-Bank rason den e motibo di retiro. Esaki despues cu e empleado femenino en cuestion a critica maneho di Minister Dangui Oduber relaciona cu e proyecto hotelero, St. Regis Resort, cu ta di un cliente di AIB-Bank.
E ehecutivo aki ta trahando na AIB desde 2014 den un funcion ehecutivo, unda cu e ta suheto tambe na codigo di etica di e banco. E reglanan ta menciona entre otro cu mester protege informacion di clientenan y tuma tur medida prome cu comparti esaki cu otronan, den of pafo di trabou. Y no mag discuti asuntonan di cliente den luganan publico of cu tercer partido. Y pio no mester mustra cu AIB-Bank tin cierto preferencia politico of ta apoya un politico pa cual nan ta wordo recomenda pa evita di ta envolvi den actividadnan politico. E empleado a firma cu e ta compronde y acepta e reglanan nobo.
Pero ta parce cu el a lubida riba esaki pasobra na september 2018, el a pone su opinion riba un post publico di Minister di Turismo, Salubridad Publico y Deporte (Dangui Oduber) relaciona cu un proyecto hotelero, St. Regis Resort, den cual STIPA (un cliente di AIB-Bank), ta e desaroyado.
Loke el a skirbi tabata: “Ta basta Dangui. E unico hendenan cu lo beneficia di e hotel aki ta boso (placa bou mesa) Y STRANHERO, Stipa, su contratistanan stranhero y e trahadonan stranhero.”
Loading…
Reload document 
Open in new tab Riba e Facebook di dje ta para cu e ta traha na AIB-Bank. Directiva di e banco a reuni cun’e y el a splica cu como ciudadano di e pais aki e kier a reacciona riba e Memorandum firma pa construccion di un hotel nobo yama St. Regis. E ta bisa cu ora cu el a pone su comentario e no a tene cuenta cu su funcion y despues el a lamenta di haci esey. E mesun dia ey a pone riba non-actief y for di e dia ey e no a drenta AIB-Bank mas pa haci su trabou.
AIB-Bank a dicidi di pidi Corte permiso pa retira e empleado aki. Corte ta haya cu e empleado a duna su doño di trabou, cu publicacion en cuestion, un motibo urgente pa su retiro di inmediato. Ta tene cuenta cu Gobierno y STIPA ta clientenan fiho di AIB-Bank. Den e publicacion di e empleado el a menciona nomber di e Minister y di STIPA. Y e “post” ta sugeri soborno fuertemente. E no por wordo mira otro cu un acusacion cu clientenan di AIB-Bank, entre otro Gobierno y STIPA, ta envolvi den actividadnan castigabel. Y hustamente e dia ey mas tempran AIB-Bank a firma un acuerdo cu STIPA.
Corte a bisa mirando su funcion, e mester a abstene di haci comentarionan publico di e forma aki cu por causa daño na clientenan di AIB-Bank. A base di tur esaki ta conclui cu el a viola e reglanan con un bon trahado mester comporta su mes pa cu su doño di trabou. Y Corte ta haya cu e derecho di libertad di expresion di e empleado, mirando e interesnan di AIB-Bank y su clientenan, den e caso aki ta hustifica di a wordo limita.
Pa e motibonan ey Corte a otorga AIB-Bank permiso pa termina e relacion di trabou entrante 13 di februari ultimo.
