Aki ta sigui un resumen di noticianan policial pa dia 5 di Augustus 2017.
Polis a topa cu droga den auto
ORANJESTAD – Durante patruya den Emanstraat, polis a mira un Toyota Tercel blanco riba un tereno di santo habri, unda cu hopi uzado di droga y adictonan ambulante ta frecuenta. Ora a yega cerca di e chauffeur, el a duna su nomber como H. Polis a mira cu e tabata tin un piedra parecido na cocaina den su man drechi. A base di esaki, a bay ristra su paña y a wordo pidi pa sali for die auto. Ora cu el a sali afo, a nota cu den su planta di man robes, el a laga dos piedra di cocaina cay. Tambe na su paña a bin haya un saco di plastic doorzichtig cu marihuana den dje. E droga a wordo confisca pa mas investigacion y tambe na disposicion di departamento di narcotica. E auto a wordo confisca, mirando cu e no tabata tin ningun documento valido.
Ladronicia den Nature & Discount na Palm Beach
PALM BEACH – Central a manda patruya na Nature & Discount Aruba, situa na Palm Beach pa un ladronicia. Eynan polis a papia cu e encargado. El a declara cu e negoshi ta habri pa 8’or di mainta y cera pa 6’or di atardi. Diabierna, el a cera e negoshi na dicho orario. Tur cos tabata bon y el a laga tur cos intacto. Pa 4’or y 35 di marduga diasabra, alarma di Safecom a bay on di dicho localidad. Ora cu perosnal di Safecom a bin na e sitio, a ripara cu e slot di e hekwerk di hero parti patras, banda pabao di e localidad, tabata kibra. Ora cu a bay controla e porta banda panort di e luga, nan a mira cu esaki a wordo forsa. Desconocidonan a forsa e porta pa drenta paden y pa comete ladronicia. Na e sitio nan a mira dos ijsbreker, 2 pata de caba y un pechi berde. Dicho hermentnan a wordo confisca. Departamento tecnico y Central a wordo poni na altura.
Ladronnan a bay cu bumper di auto
NOORD – Central a dirigi patruya den Briezenstraat pa un caso di ladronicia. Eynan a papia cu e dama A., kende a declara na patruya cu su auto, un Kia rio color blanco, a haya daño na e verf preto na e parti links di e bumper y daño di verf cora y tambe e bumper a wordo horta. Keho a wordo tuma. Central a wordo poni na altura.
