Resumen policial pa dia 3 di Augustus, 2017

Aki ta sigui un resumen policial pa loke ta dia 3 di Augustus, 2017.

Pelea den Weststraat

ORANJESTAD – Durante patruya den Weststraat, polis a mira un pelea tabata formando. Nan a sali for di auto y a papia cu un hoben y a core di e sitio pa su propio siguridad. Algun seconde despues, e mesun hoben a cana drenta den e multitud y despues e tabata tira abao cu un golpi na cara door di un otro persona. Polis a pidi pa mas refuerso na e sitio, mirando cu cantidad di persona cu tabata para pafo di e edificio y cu mester a wordo desaloha. E contrapartido di e pelea yama M. a declara cu el a wordo agredi na su cara pa un tal F., di cual el a reacciona cu un mokete, unda cu F. a cay abao. M. a desea di duna keho di maltrato y a wordo avisa pa bay na e departamento di recherche na Playa. F. no tabata mas na e sitio. Polis a sigui cu patruya. Weststraat rapidamente a keda bashi y a keda trankilo.

A horta den auto den John G. Emanstraat

ORANJESTAD – Central ta dirigi patruya na altura di e plenchi di santo situa banda di watertoren den John G. Emanstraat, pa ladronicia den un auto. E causante ainda lo mester tabata na e sitio. Aparentemente lo mester tabata trata di un adicto ambulante y lo ta di color cla, cu un carson cortico bisti. Na e sitio a papia cu e dama P., kende a declara cu el a para su auto pa mas of menos 6’or y mey di mainta y pa 9’or y 5 el a cana bay bek na su auto y a ripara cu desconocidonan mester a drenta den dje. Desconocidonan a bay cu 7 CD. P. a declara cu e no a yama polis. Keho a wordo tuma si.

Musica duro den Ranchostraat

ORANJESTAD – Diahuebs, Central ta manda patruya den Ranchostraat na altura di crusada cu Visstraat pa musica halto. Eynan a topa cu e conocido gang di Ranchostraat, kendenan tabata tin musica halto. Patruya a papia cu nan pa baha e musica, nan a mustra comprension y a haci esaki. Central a wordo poni na altura. Pa banda di 10’or y 40, Central a bolbe manda polis pa e mesun melding. Na e sitio un biaha mas e gang di Ranchostraat a wordo desaloha, pero esakinan a bira fresco, pero si a mustra comprension y a bay for di e sitio. Central a wordo poni na altura.

Hobencita a bira malo pa motibo di calor

PALM BEACH – Diahuebs, comandante na warda a manda patruya pa control entre 7’or y 12’or di marduga, den e area di hotel. Na pia y parcialmente den auto, nan a tene control entre Divi Phoenix y Palm Beach Plaza. Pa mas of menos 7’or y 58 di anochi, polis a mira cu un hobencita lo tabata sinti su mes malo y tabata drumi riba e acera na altura di Salt & Pepper Restaurant, mientras cu su tata tabata tene su pianan na halto. Polis a papia cu e mayornan, kendenan a declara cu no ta prome biaha cu esaki ta pasa, cu nan yiu muhe di 16 aña, a bira malo door di calor. Segun e mayornan, su presion a baha. Riba e pregunta di polis pa por yama ambulance, e mayornan a declara cu no ta necesario y cu e lo mehora, aunke cu nan a pidi pa un glas di awa. Polis a busca un glas di awa pa e hoben. Despues cu esaki a bebe e awa, el a sinti su mes miho, di cual e mayornan a hib’e na un espacio mas fresco. A bin parce cu tabata tin hopi hende, di cual hopi di nan turista, tabata riba pia y como cu nan tabata crusa JE Irausqion Boulevard sin haci uzo di e zebrapadnan. Akinan a meld cu tur e zebrapadnan for di The Mill Resort te cu Palm Beach Plaza tabata falta verf y cu nan a bira casi invisibel.