Aki ta sigiu un resumen policial pa loke ta diabierna, dia 10 di November 2017
Turista Hulandes a wordo menasa na beach
SPAANS LAGOEN – Diabierna, pa mas of menos 10’or y 15 di mainta, Central ta manda patruya na Mangel Halto, caminda un homber lo a menasa algun turista riba beach. Polis tabata coriendo den vecindario, pero no a wordo acerca pa ningun hende. Polis a dicidi di baha for di auto y a tene un patruya na pia canto di lama. Algun hende riba beach a duna seña. Algun homber tabata bezig ta haciendo algun trabao di limpiesa, a mustra polis cu un dama lo tabata tin algo conta. E dama a indica cu e ta G., naci na Hulanda y ta kedando temporalmente na Aruba. G. a declara cu e tabata riba beach na Mangel Halto. E tabata bezig ta haci yoga ora cu diripente un hoben desconoci, color bruin, bisti cu un carson cortico preto, sin flanel, cu ked preto y cu un pechi cu Gucci skirbi riba dje, a cana bin den su direccion. e homber a cana algun biaha den circulo rond di dje. E hoben tabata rap. G. no a dun’e ningun atencion y a sigui cu su entrenamento. Despues e homber a bisa G. na Ingles palabranan hopi menasante y insolente den su direccion. G. a saca un potret di dje y a cana bay. G. a declara cu el a cana bay cerca e hombernan cu tabata bezig ta haciendo algun trabao riba beach y a puntranan si nan por yama polis. Polis a nota cu durante cu a tuma e declaracion di e dama, G. a spanta hopi. Despues cu el a caba, el a puntra polis si por compañe pa su auto, pasobra e tin miedo y no sa si e sospechoso ainda ta den e vecindario y cu e por haci’e algun daño. G. a mustra polis e potret di e sospechoso. Polis a reconoce e homber riba e potret como e conocido di polis y husticia HH, kende ta biba den Scobillostraat. ta conoci cu HH ta anda den vecindario di Mangel Halto y ta mustra su partinan priva na bishitantenan di e beach. A base di esaki, polis a bay na cas di HH den Scobillostraat. HH tabata sinta den un auto color shihishi, marca Montana, modelo Silhoutte, sin number di auto, cu tabata na entrada di e cas. HH a sali for di e auto y a cana aby den direccion di polis. A bis’e kico a pasa. Pa mas of menos 10’or y 35 di mainta, polis a deten’e y a hib’e warda, caminda cu el a keda presenta dilanti di fiscal auxiliar y despues encarcela pa mas investigacion.
Hoben cu trastorno mental ta molestia riba hi-rise strip
PALM BEACH – Diabierna, pa mas of menos 11’or y 20 di mainta, chief security di un hotel grandi a yama warda y a conta cu nan tin problema cu un hoben, kende posiblemente lo mester tabata bao di un ke otro substancia. Segun e chief security e hoben aki tin un pechi shinishi, un tshirt shinishi y un carson largo color scur, tabata molestia nan huespednan, door di tira cos riba nan y tambe ranca nan brasa. Personal di hotel a bay atende cu e hoben aki, pero esaki a bay den direccion di e parkinglot di The Cove. A base di esaki, patruya di Strand a bay controla den vecindario di dicho hotel y The Cove. Na yegada di polis, nan a controla te cu Moomba Beach, pero no a topa cu e hoben. Mirando cu nan no a topa cu e hoben, nan a bay na e hotel pa haya mas informacion. Na nan yegada, Central ta manda informa cu e hoben aki ta riba e parkinglot di Paseo Herencia. A base di e infomacion aki, polis a bay Paseo Herencia. Eynan nan ta bin topa cu e conocido CG, kende ta sufri di un ke otro trastorno mental. El a wordo atendi, mirando cu cada biaha e ta wordo cori di e area. Un biaha mas e ta wordo cori di e sitio. El a cuminsa cana bay direccion di Palm Beach Plaza. Polis a sigui core rond y a nota cu el a cana door di Palm Beach Plaza, pero no a sali for di esaki. Finalmente el a sali pafo, y polis a acerk’e, mirando cu na prome instante el a bisa cu e ta biba na Mabon, a papia cu Central pa hiba G mita caminda, pa asina e bandona e area di e hotelnan. Durante cu tabata wardando e transportwagen, personal di Noord a presenta y a indica cu e homber ta biba den Jansstraat y no na Mabon. Despues di a confronta esaki, el a declara cu berdad e ta biba na e adres eynan y no na Mabon. El a declara cu su tata ta biba na Mabon. A base di esaki, a hib’e na e adres den Janstraat. El a wordo atendi un biaha mas prome cu el a wordo hiba na su cas, pa e keda for di e vecindario di e hotelnan y molestia e turistanan, riba cual el a mustra comprension. Central a wordo poni na altura.
Hobencita agresivo ta resisti contra polis
MONSERAT – Diabierna, pa mas of menos 12’or di merdia, comandante na warda a pidi pa patruya cu tabata riba caya, presenta na warda pa un asistencia. Na warda, nan ta wordo poni na altura cu tin cu bay asisti personal di voogdijraad na Monserat. Esaki den cuadro cu un hobencita menor di edad K., kende tin cu bay na Orthopedagogisch Center, den cuadro cu un vonnis di Corte di prome instancia. Hunto cu personal di voogdijraad, pa bay cerca K. y cu si e no kier bin, pa duna un man. Parce cu K. no kier a bay y a cuminsa grita y resisti. Di biaha a cuminsa reforsa e personal. Polis a purba di convence, pa bay sin cu tin cu uza forsa bruto. Door di a papia hopi cun’e, a logra un ke otro pa convence pa e bay. Durante cu tabata bezig cun’e, su amigo a bin cerca dje y a cuminsa uza palabranan menos nechi cun’e. Tambe el a purba di uza forsa pa por sak’e for di e tereno. Polis a bisa e cabayero pa keda leu, pasobra e ta bezig ta stroba trabao di polis. Akinan el a rabia y a cuminsa insulta polis. Despues di esaki, a atende riba su comportacion, pero toch e ta keda insulta y reta polis. Dado momento el a coy un bloki grandi for di vloer y a cana bay den direccion di polis pa por brung’a cun’e. Akinan dado momento polis a saca su arma reglamentario y a arma esaki. Ora el a wak esaki, el a tira e bloki di biaha abao y a core bay y a bay para bao di un dak. Mirando cu K. a keda haci fastioso, a pone e arma bek den e holster y a bay yuda su colega. A logra di calma e damita y a pone den auto. Despues a core bay direccion di OC situa na Tarabana pa asina lag’e eynan.
Marlonchi ta haci fastioso dilanti di negoshi
SAN NICOLAS – Diabierna, pa mas of menos 5’or y 25 di atardi, un homber a yama warda pa molester di un adicto ambulante. Na yegada di polis, ya Marlonchi no tabata tey mas. Polis a papia cu e doño di La Aruba #2, kende a declara cu e conocido adicto ambulante, Marlonchi, ta molestia nan. Marlonchi lo a manda un bolo na e entrada di e localidad. Polis a controla den vecindario, pero no a topa cu Marlonchi. Comandante na warda a wordo poni na altura.
