Den fin di siman a tuma luga e Puerto Rico Open “G1” unda cu e dos rumannan Klabér a participa bou guia di ex campeon mundial coach Olimpico Henk Meijer kende a biaha for di Hulanda pa asina coach e dos rumannan na Puerto Rico, pasobra tur esaki ta parti di e plan di 2019/2020.
Cornel Djaoen di nos planta nacional a compaña e rumannan y esaki a wordo transmiti bibo y directo for di Puerto Rico. Ainda por wak e interview cu Cornel Djaoen a haci cu Henk Meijer y e dos rumannan Klabér ariba e Facebook Page di Brazil Taekwondo Stichting.
Diabierna 5 di April e competencia a cuminsa y Jourdé Klabér a bringa den e categoria di -63 kilo y a topa cu Nicolas Avellaneda for di USA y a logra gana esaki cu un score di 27-10. Jourde Klabér a topa Luis Pie di Santo Domingo den e di dos rond y Jourdé Klabér a perde cu un score di 18-3. Záhyon Klabér cu a bringa den e categoria di -68 kilo a topa cu Victor Oscar Martinez Silva di Puerto Rico y a perde esaki 6-5.
Cornel Djaoen tabata bibo y directo tur dia via facebook page di Brazil Taekwondo Stichting y por wak esaki ainda. Locual ta sigui pa e rumannan Klabér ta cu nan ta bay sigui prepara pa mehora nan errornan y traha ariba locual Henk Meijer a laga pa nan traha ariba dje pa nan siguiente evento cu ta bay ta dos campeonato tras di otro.
