Aki ta sigui un resumen di noticianan policial pa loke ta dia 1 di November 2017.
Muhe a coy hark pa defende su mes dilanti casino
ORANJESTAD – Diaranson, pa mas of menos 4’or di marduga, Central ta manda patruya na altura di Crystal Casino pa un dama fastioso kende tabata para dilanti di e casino cu un hark. Polis a topa cu e muhe canando direccion zuid dilanti Royal Plaza. El a indica cu e ta un tal V. El a sigui bisa cu un homber kier a dal’e dilanti di Crystal Casino y pesey el a coy un hark cu el a haya abao pa defende su mes. Fuera di esey, e no kier problema cu ningun hende y kier a djis bay cas. El a wordo manda cas tambe. Central a wordo poni na altura.
Intento di ladronicia na ATM di Aruba Bank na Paradera
PARADERA – Diaranson, pa mas of menos 4’or y 27 di marduga, Central a dirigi varios patruya na e mashinnan di ATM di Aruba Bank na Paradera pa un caso di ladronicia. Eynan polis a mira cu e alarma di e night deposit ta esun cu tabata cendi y despues a paga. A controla den vecindario pa dos persona bisti completamente na preto, manera cu a wordo informa na central. No a topa cu ningun hende. Central a wordo poni na altura.
Amante di homber ta menasa casa
ORANJESTAD – Diaranson, pa mas of menos 2’or y 20 di merdia, a presenta un dama kende a declara cu e kier duna keho contra un otro muhe, kende yama M. El a conta cu M. ta un muhe hoben for di Venezuela y cu ta molesti’e. M. tin relacion cu casa di e denunciante, e homber P. El a sigui bisa cu M. no ta lage na paz y ta manda mensahenan via whatsapp y cu tambe a menase. M. a mustra e mensahenan, pero no por a saca afo un menasa. El a declara cu el a delete e menasanan. M. a para riba cu e kier duna keho door cu Warda nos Costa a bis’e cu si e haci un denuncia contra di M., nan lo bay busca M. pa asina deport’e for di Aruba. El a wordo avisa pa bay na oficina di Recherche.
Problema entre bendedonan Venezolano y cumprado local
BARCADERA – Diaranson, pa mas of menos 5’or y 40 di atardi, Central a manda patruya na e waf di Barcadera pa un problema entre algun homber Venezolano y un cumprado. Na e sitio polis a papia cu e dama L, kende a declara cu personal di departamento di salud a bisa cu e keshinan no mag di bandona e waf pa benta. Riba tur e keshinan a benta fuel y cu esey ta malo pa salud. Tur e keshinan mester wordo distrui. Tambe L. a bisa cu e capitan di e boto The Warrior a [aga [a mam caba. Tambe el a bisa cu el a paga pa e keshinan y tambe pa otro productonan den bleki, entre otro Malta y “Atun”. E tabata kier a haya e otro productonan. Fuera di esey, miembronan di tripulacion di e boto Venezolano, a menasa un miembro di famia di L. Tambe a papia cu e homber GF. El a declara cu e keshinan no a wordo bon treci y cu e nan sufri daño. Tambe el a bisa cu nan no a menasa ningun hende. A papia cu e homber W. di Douane, kende a declara cu azeta a cay riba e lechi crema y fuel a cay riba e keshinan. Door di esey, salubridad publico a dicidi pa tene un control, cu e productonan a sufri daño y cu e siguiente dia nan mester wordo distrui. A intermedia y a papia cu ambos partido. Diahuebs por haya e otro productonan y cu loke a wordo daña lo wordo distrui pa salubridad publico. Paz a wordo restaura y Central y tambe comandante na warda a wordo poni na altura.
