Resultadonan Campeonato Himno y Bandera di Landamento Artistico

Resultadonan di e Campeonato Annual di Himno y Bandera di Landamento Artistico organisa pa Barracudas y AZB ta aden. E weekend tawata yena cu emocion di atletanan y di e publico presente. A tene e competencia den categorianan di 10&U, 11-12, 13-15, Junior y Senior.

Categoria di 10 and under:Tur atleta di 10 aña y mas jong ta cai den e categoria aki. Tin atleta cu ta preparando pa competencia di NOVATOS, cu lo tuma lugar na Fort Lauderdale na luna di Mei. Esaki ta un competencia specialmente pa atletanan cu nunca no a participa ainda na niun competencia grandi.

Categoria di 11-12. Tur atleta cu tlo cumpli 11 of 12 aña durante 2019 ta cai den e grupo aki. E team aki ta preparando pa competencianan internacional tumando lugar fin di juni, CCCAN na Barbados, y fin di augustus, UANA na Canada.

Categoria di 13 -15. Tur atleta cu e edad di 13 pa 15 aña na 2019, ta participa den e categoria aki, y e team completo tambe ta preparando pa CCCAn y UANA.

Categoria Junior. Junior ta categoria di 15 pa 18 aña. Y e rutina technica ta consisti di cierto elementonan obligatorio. Esaki ta wordo landa en bes di e evento di figuras cu e atletanan mas jong si tin cu hasi.

Categoria Senior. Senior ta categoria di 18 aña bai ariba. Locual mester menciona ta cu Abigail de Veer a landa e rutina su so, pasobra su Duet partner, Kyra Hoeverts ta na merca na e momento aki pa su College.

E competencia a dura dos dia y a inicia cu e competencia di figura (Figures) ariba diasabra 16 di maart pa 9:00am cu a enfoca ariba cierto elementonan obligatorio den e deporte di landamento artistico. Atletanan mester hasi algun movecion basico segun stipula den e reglanan di FINA y hueznan presente ta duna nan un punto di 0.0 – 10.0. Mayoria di e figuranan ta rekeri cu solamente e pianan di e atleta ta visibel ariba e awa, dus e atleta su cabez mes ta bou di awa pa algun seconde. E evento di figura ta pa categoria 10U, 11-12 y 13-15 y e resultadonan ta lo siguiente:

Categoria 10U: 1e lugar: Xiana Hoo, 2o lugar: Xia Rodriguez y 3er lugar: Katiana Vizhco

Categoria 11-12: 1e lugar: Sofia Cardona, 2o lugar: Abizahi Sanchez y 3er lugar: Silvana Cardona

Categoria 13-15: 1e lugar: Mikayla Morales, 2o lugar: Angelina Hamoen y 3er lugar: Avigayle Tromp

Aruba diadomingo 17 di maart pa 7or di anochi Sra. Edda Dijkhuizen, president di e club di Barracudas a inicia e anochi oficialmente, yamando bon bini y gradiciendo tur presente pa asina cuminsa cu competencia di rutinanan (routines) di solo, duet y team den tur categoria. E asina yama rutinanan ta enfoca ariba e parti bunita di e deporte cu tur hende conoce, e sinchronisacion cu e musica mientras cu nan ta den e awa, e baile aquatico. E atletanan ta eherce diferente elementonan combina di landamento, baile y acrobacia den nan coreografia y movecionan creativo. Nan ta ricibi punto pa e rutinanan entre 0.0-10.0 basa ariba e dificultad di e rutina, impression artistico y e ehecucion di e elementonan.

E resultadonan di e routines di e anochi aki ta lo siguiente:

Solo Categoria 10U: 1e lugar: Xia Rodriguez y 2o lugar: Katiana Vizhco

Solo Categoria 11-12: 1e lugar: Abizahi Sanchez, 2o lugar: Sofia Cardona y 3er lugar: Hildeswind Kluiving

Solo Categoria 13-15: 1e lugar: Avigayle Tromp y 2o lugar: Angelina Hamoen

Duet Categoria 11-12: 1e lugar: Abizahi Sanchez y Sofia Cardona, 2o lugar: Silvana Cardona y Alina Dirks y 3er lugar: Yasmin Grootveld y Emylaine Mathilda

Duet Categoria 13-15: Angelina Hamoen y Mikayla Morales

Duet Categoria Junior: Kaina Croes y Meghan Tromp (Duet Free y Solo Tech)

Duet Categoria Senior: Abigail de Veer (Duet Free y Solo Tech).

Team Categoria 11-12: Silvana Cardona, Sofia Cardona, Alina Dirks, Amylene Helder, Abizahi Sanchez, Camila Tromp y Xiana Hoo.

Team Categoria 13-15: Edianne Croes, Ariana Dijkhuizen, Angelina Hamoen, Mikayla Morales, Maria Jose Salazar, Abigail Sanchez, Ambar Silva, Avigayle Tromp, Melanie Tromp y Zahira Varis.

Nos ta felicita tur atleta cu a logra conkista un medaya. E deporte aki no ta fasil, e ta exigi hopi disciplina y trabou duro pa por logra ta exitoso. Pa un bista di tur e resultadonan y mas potret di e weekend tras di lomba por bishita nos riba facebook. Siguramente e publico presente a experiencia dos dia bunita di e deporte di landamento artistico.

Cu e campeonato aki tras di lomba nos atletanan ta prepara pa e Competencia Nacional cu lo tuma lugar 1 y 2 di Juni proximo. Asina lo forma e seleccion cu lo representa Aruba na e competencia di CCCAN (Confederación Centroamericana y del Caribe de Natación) cu lo tuma lugar na Barbados fin di juni, y UANA (Union Americana de Natacion) cu lo tuma lugar na Canada fin di augustus 2019.

Ken nos ta?

Barracudas Aruba desde 1973 a introduci e comunidad di Aruba na e bunita deporte di landamento sincronisa, den 2017 a cambia e nomber di e deporte pa landamento artistico. E meta principal di e club ta pa brinda atletanan oportunidadnan pa desaroya y prepara nan mes den e deporte pa competencianan international. Recientemente a habri e deporte pa mucha homber por participa mirando e desaroyonan den e deporte internationalmente. Pa mas informacion of pa conecta cu nos por bishita: Facebook @barracudas.aruba of nos website: www.barracudasaruba.com, Barracudas Aruba ta e unico club di Landamento Artistico na Aruba y ta afilia na Arubaanse Zwembond cu na su turno ta miembro di F.I.N.A.

Comments

comments