Ultimo grupo di studiante a yega bon Hulanda

Den fin di siman cu a pasa e grupo di 13 studiante cu a keda pega na Aruba a yega Hulanda. Un parti di grupo a yega diasabra 5 di augustus, mientras cu e resto cu a consisti di diez studiante a yega un dia despues, esta diadomingo 6 di augustus. Esaki debi cu e avion di COPA Airlines cu mester a hiba nan Panama pa conecta riba e vuelo di KLM, a yega cu retraso Aruba.

Riba tur dos dia e studiantenan a wordo ricibi na Schiphol pa directora di Arubahuis Shandra John, functionarionan di departamento di Enseñansa di Arubahuis, mentor y miembronan di e “Plaatselijke Opvangcommissie” (POC).

Shandra John a bisa na Schiphol na e studiantenan cu e ta contento cu porfin despues di asina hopi contratiempo e ultimo grupo di studiante a yega Hulanda ‘E POC di e ciudadnan conhuntamente cu e mentor a zorg pa entrante dialuna tin un programa di “opvang” igual na loke e otro studiantenan a haya. Nan ta zorg pa tur boso asuntonan oficial keda regla pa boso por cuminsa cu boso estudio sin ningun problema,’ asina directora di Arubahuis Shandra John a bisa.

Arubahuis ta hopi gradicido na e mentor y e grupo di POC cu a pone mas tempo disponibel pa asina e studiantenan aki ricibi e informacion y prepraracion nesesario, apesar cu nan a yega Hulanda despues di e periodo stipula.

Di e grupo di 13 hoben, ocho studiante ta pa Den Haag, dos ta bai Utrecht, un ta pa Rotterdam, un ta bai Leeuwaarden y un ta pa Amsterdam.