Restaura un monumento den su gloria y elo conta bo su storia

129

E aña aki ta cumpli 25 aña cu Aruba ta conservando nos herencia cultural den forma di monumento. E trabou di conservacion di nos monumentonan ta den man di tres instancia, Conseho di Monumento (Monumentenraad), Oficina di Monumento (Monumentenbureau) y Fundacion Fondo di Monumento (Monumentenfonds).

Pa conmemora e 25 aniversario, Monumentenbureau y Monumentenfonds lo organisa diferente actividad pa brinda informacion y conscientisa Pueblo riba e importancia di conservacion di nos monumentonan como herencia cultural di nos Pais. Recientemente Gobierno a participa na un programa informativo di Monumentenfonds, den cual mandatario a amplia riba importancia pa conserva monumento. ‘Restaura un monumento den su gloria y elo conta su storia,’ ta e palabranan cu Minister Maduro a usa den e entrevista pa e programa informativo di Monumentenfonds na ocacion di 25 aña di conservacion di monumento na Pais Aruba.

Den transcurso di e añanan hopi monumento a wordo restaura y ta ricibi mantencion. Na e momentonan aki mes, Monumentenbureau ta supervisando mantencion di edificio di Corte di Husticia, edificio di ex-Landslaboratorium y e edificio di e refineria Eagle cu ta monumentonan di nos Pais.

Gobierno a gradici tur 3 instancia encarga cu conservacion di nos monumentonan y ta haci uso di e oportunidad pa gradici tambe tur instancia cu ta duna e monumentonan un bida nobo, door di huur un monumento pa establece nan oficina of restaurant. Di e manera aki mas monumento por keda conserva y mas persona por siña conoce e monumentonan cu ta conta e storia di nos Pais y ta recorda nos tur dia pa nos ta orguyoso di nos herencia cultural. Ta invita tur hende pa sigui e informacion cu Monumentenbureau y Monumentenfonds lo brinda den e dianan nos dilanti di e monumentonan di nos Pais cu ta nos herencia cultural.