Mundialmente protestanan pacifico ta lantando rapidamente contra e silenciamento di victimanan di abuso sexual di menor y e mal maneho den probelmatica aki di parti di Watchtower Society. E corporacion cu ta maneha e actividadnan di Testigonan di Jehova ta sigui purba di catch up cu mas di 6 decada di fayonan enorme y negligencia, manera Barbara Anderson a pone den un entrevista reciente. E activista y vocero pa victimanan di abuso sexual aki ta un exBethelita di Testigonan di Jehova cu a sali publicamente riba Dateline na 2001 cu detayenan di e mal maneho aki. 18 aña a pasa y ta te den e ultimo anja of dos nan a tuma algun paso pa ahusta nan polisanan rond di e topico. “Si, e ta un paso den e direccion correcto, lastimamente e no ta suficiente accion ni compasion pa e victimanan di e ultimo 60 aña”, Barbara ta bisa cu firmesa.
Luego di a revisa e buki secreto di procedura di Anciano “Shepherd God’s Flock” na fin di 2018, awo na Juli 2019 tur congregacion di Testigo di Jehova rond mundo a studia e tema di e Atalaya di Mei 2019 cu tabata toca e tema di abuso sexual di menornan den nan comunidad. Aunke hopi famianan di victimanan y e victimanan di abuso sexual den e ultimo 50 pa 60 aña a spera di ricibi un palabra di despensa, un tiki compasion y cierto alivio, e studio aki a ofrece mas bien un man frieu pa cu e victimanan, e palabra di disculpa pa decadanan di mal maneho, nunca a bin. Watchtower una bes mas a nenga di admiti nan mes un papel den esaki.
Mientras cu den punto di bista di liderasgo di Watchtower e studio aki ta nan manera pa mustra cu nan ta actua pa proteha mucha den nan comunidad. E no ta nada mas cu un recordatorio amargo cu Watchtower no tin e e muchanan di awo ni e victimanan di pasado na pecho.
Abuso di Mucha “Pica” Enves di Crimen
E daño haci na e victimanan y e riesgo pa muchanan den futuro no ta nan prioridad, e articulo no ta mustra ningun compasion alguno cu esnan afecta pa e crimen aki, y ta pone hopi enfasis pa informa cu esaki ta un pica. Den e articulo no ta para ariba cu firmesa cu e ta un crimen y pa notifica e autoridadnan debido de un bes. No, Watchtower ta laga espacio pa esaki tuma lugar solamente unda e ta un requisito legal. Mientras cu den otro casonan di crimen y conflicto si testigonan ta haci uso di man derecho pa yama polis libremente, e instruccion ta pone enfasis riba tur otro cos menos e hecho cu e ta un crimen serio.
Esaki ta e manera cu nan ta hunga cu palabra pa sconde kico en berdad a y ta sigui tuma lugar den nan organizacion: e proteccion di criminalnan y obstruccion di justicia.
Casonan di Aruba
Desde e prome remitido cu a ser publica e aña aki y e interview cu a wordo haci atraves di algun medio di comunicacion a drenta mas raporte di casonan cu a sosode aki na Aruba mes, di e ultimo 30 anja.
Por ehempel, a caso di un mucha muher cu a señala e persona cu bin mishi cu ne inapropiadamente na su curpa abou na e ancianonan na su congregacion. Nan hibe un banda sin su mayornan, bise cu e cos nunca no a pasa y pa e lubida esaki. E anciononan a pone nan man riba dje pa tene abou pasobra e no a responde contento na esaki.
Un otro caso varios mucha muher di diferente edad a wordo abusa sexualmente pa un muher adulto pa varios aña. E persona aki a wordo señala tambe den otro incidente cu un mucha homber unda cu e adulto a bise pa e bin mishi cu su partinan intimo.
Un otro hoben den scol secundario a haya su mes ta wordo viola pa un adulto cu tabata sierbo ministerial den su congregacion. Ora e la trece esaki dilanti nan a sak’e di congregacion bou acusacion di ta homosexual, y e adulto mes no a para responsabel pa su accionan. E hoben aki a haya su mes ta haci atento di suicidio despues di a keda sin hogar pasobra su mayornan no a sak’e di cas aunke e tabata menor di edan. Hopi mas hoben victima ta haya nan mes sin sosten familiar den situacionan similar.
Den un otro caso un hobencita menor di edad a wordo duna alcohol na beach pa un pareha cu tabata pionero, nan a purba tene relacion cune y a practica stimulacion di su parti intimo prome cu e la logra sali for di laman y pidi pa bay cas.
“Laga e asunto den Jehova su man”
Mayoria di e casonan cu ta bin dilanti nunca ta yega na autoridad of instancianan concerni pasobra den comunidad di Testigo famianan ta wordo encurasha pa “no crea division y mantene pas”. Hopi ta usa e expresion “laga e asunto den Jehova su man” asina lagando e crimen pasa y ripiti, y sin duna e victima justicia of e sosten emocional profesional cu e mester. E manera di razona aki ta wordo haci dor di controla manera di pensa di miembronan, lo papia den futuro mas tocante e peliger di un grupo “high control” y con e ta wordo haci riba nivel psychologico.
Tendencia pa Evita Papia di Asunto
Cu asina tanto storia tristo y preocupante cu ta saliendo na cla di muchanan cu a wordo abusa pa adultonan den nan grupo of congregacion, e manera sin gevoel cu den comunidad di Testigo ta responde ora victima bin dilanti ta ainda mas sorprendente. Durante un reunion un mucha di 7 aña a comenta cu e tambe a biba abuso sexual, e comentario di un Testigo activo cu tabata presente tabata tipico pa e comunidad di silencio cu tin den Testigo di Jehova: “mayornan ta mas atento di sa prome kico nan jiu kier comenta pa evita cu na bisa cos asina fuerte publicamente den reunion.”
Testigonan en general ta rechasa rotundamente cu nan liderasgo a mal maneha e problema di abuso sexual di mucha, hopi asta ta kere cu ta mentira so man ta, nan tin un punto di bista troci cu esnan cu ta lanta ariba y papia di e topico aki kier incita odio y ta contra Dios mes, yamandonan “apostata” y gañado. Mientras cu Watchtower ta nenga di admiti na su seguidornan, cu de hecho nan a apunta hombernan na posicionan di poder den congregacionan cu tabata conoci como abusadornan convicto, es decir cu a wordo haya culpable, a bay prison y a cumpli nan sentencia. Testigonan di Jehova tambe ta mik di studia bijbel cu personan convicto den prison incluyendo abusadornan di mucha na un manera hopo laxo, por ehempel un carta di Juni di 2006 cu congregacionan na ricibi na Merca a referi na e convicto di abuso di menor “Child-maltreatment offenders”.
Conclusion
Testigonan ta presenta un imagen di ta cuidadano cu ta obedece ley y ta stima justicia, pero nan accionan pa cu abusadornan den nan comunidad ta bisa algo hopi diferente. Na final di dia, e pregunta ta keda na cada miembro individual: kico Jesus mes a haci den bijbel ora e lidernan tabata culpable di injusticia y corrupcion? Laga nos NO lubida cu e la saca na de un bes di e cas di su Tata, y a benta abou nan mesa y pasa man cu sweep. E no a dobla su man y bisa lague den Jehova su man.
Awo no ta encurasha violencia den ningun forma, pero si un demonstracion di solidaridad y accion pa saca e hombernan corrupto aki for di “cas di Dios”. Si di berdad e Testigonan tabata wak nan mes manera e cas di Dios, nunca hamas nan lo a permiti e miles di casonan asinaki.
Pa haci bo mes un investigacion ta encurasha e lesado pa subi riba Google y busca Jehovah’s Witnesses Australian Royal Commission, Candace Conti, Leah Remini entre otro.
Nos ta mirando cu mundo henter ta lantando ariba pa defende esnan cu no por defende nan mes, esaki ta aplicabel no solamente pa rescata bestia of nos recurso natural, pero tambe nos muchanan y hobennan menor di edad, tanto femenino y masculino di tur rasa y di cualkier pais di e acto violento cu ta abuso sexual di menor.
A bira ora pa Aruba lanta ariba y bisa ta basta, y e por cuminsa na esnan mas cerca di e comunidad di Testigo di Jehova, esnan afecta. Halsa bo bos, conta bo storia, no sufri den silencio y no bira parti di nan crimen.
E proximo congreso di Testigonan di Jehova ta tuma lugar den September, ta haci un yamado na esnan interesa sostene victimanan y para cu otronan cu ta bisa ta basta di abuso y di silencio . Por email na [email protected] pa mas informacion of pregunta.
