E mudamento di un grupo di diesocho pashent di Fundacion Respaldo ta algo cu Social Psichiatrische Dienst (SPD) y gobierno ta trahando hunto riba dje. Director di Fundacion Respaldo, dr. Hendrikus van Gaalen a splica cu un parti di e grupo ta bay na e facilidad di SABA, mientras cu e otro ta bay na un propiedad di FCCA na Pos Chikito.
“Esey ta, no solamente necesario aworaki pasobra tin recorte den presupuesto, pero e ta posibel tambe,” asina e director a indica splicando c uta trata di un plan cu tabata tin caba, prome cu e recorte den presupuesto a obliga nan pa ehecuta esaki mas lihe. E diferencia ta cu lo bin un luga transitorio entre e clínica di Respaldo y e luga di estadia definitivo cu lo mester sosode mas pa fin di aña.
Den ambos localidad, e pashentnan lo haya guia di e VAK teams. E ekipo aki ta wak pa e clientenan mas dificil y problematico y por wak nan tur dia si mester pa duna nan remedi. Tambe por laga nan haci trabou comunitario. Esaki no ta kita cu e pashentnan ta acudi tambe na e clinica pa ricibi tratamento.
E director di Respaldo a probecha pa enfatisa e importancia di haya un garantia for di gobierno c uta bay haya e fondonan necesario. E ora ey na fin di aña ta muda for di e clinica aki pa otro luga pa biba. “Nunca bo sa kico por pasa. Imagina bo cu no ta haya un garantia. E por bira e fin di Respaldo pasobra no por soporta un recorte di 900 mil florin den un aña.”
