E topico di prevencion di suicidio ta un topico importante y delicado, awo en particular cu dia 10 di october Respaldo lo ta observando Dia di Salud Mental.
Segun director medico di e institucion, Hendrikus van Galen, aña pasa e tema tabata “Mental health and young people in a changing world.”
Suicidio ta un problema grandi na mundo, birando probablemente mas grandi tambe. Si wak Hulanda por ehempel, tin 40 hende pa dia cu ta bay Eerste Hulp pa un suicidio. Cinco pa dia ta muri door di suicidio y por lo menos 1900 persona pa aña. Na mundo, cada 40 seconde un hende ta muri pa motibo di suicidio.
Na Aruba ainda no tin un cifra concreto ainda, aunke nos sa di casonan di hende cu a comete suicidio.
Si bo ta wak suicidio bon, e ta bay riba tres cos. E ta bay riba problema den bida, cu hende no ta kere cu e por soluciona mas. E ta bay riba soledad, pasobra e hende cu ta pensa riba suicidio, nan no ta bay papia. Nan ta keda den nan mes pensando riba e tema eynan.
Esey ta e dos puntonan mas importante. Eynan tambe tin solucion. Tur hende cu ta papia despues cu purba di comete suicidio, despues di tempo nan por biba feliz atrobe, pasobra nan a soluciona nan problema.
E ta un pensamento cu un hende tin cu ta keda pega den bo mente, cual bo por kita. Si hende ta siña papia riba e problema cu nan tin, sea cu nan famia, nan amigonan, cu si mester, cu hendenan profesional, e chens cu esaki ta kita fo’i nan ta bira mas grandi.
Tin tres grupo grandi cu bo por haya nan den problema. E grupo mas grandi ta problema social. Pensamento riba debe, riba divorcio, riba problema cu e yiunan of problema cu perdemento di trabao y tambe trauma.
E di dos grupo ta un grupo biologico. Bo por haya problema hormonal. Door di esey bo ta bira suicidio.
E di tres ta grupo ta esnan di problemanan psicologico. No ta tur hende por soluciona problemanan mescos cu otro hende. Tin hende ta hopi impulsivo y ta bay haci un cos ora nan tin problema, manera e hecho aki.
E di cuater grupo ta hendenan cu tin problema psikiatrico, of schizofrenia, depresion, adiccion, problemanan di personalidad.
Tur hende mester siña papia mas riba nan mes, na mundo y na Aruba tambe. Bo por mira cuanto hende ta pensa riba suicidio y bo wak bo mesun bida, por ta abo mes por pensa cu bo ta fada, e ora nos tur sa pensa cosnan asina.
Na Hulanda e ta 10% cu realmente tin pensamentonan suicida. Si nos cuminsa papia riba nos mes, busca ayudo y busca manera pa kita e stress for di nos bida, nos lo ta hopi mas leu, segun dr. van Galen.
