Resando y pidiendo Dios pa sana Amy Henao

3524

SV Britannia hunto cu Arubaanse Voetbal Bond (AVB) a organisa un misa special awetardi 5:30pm na Misa di Paradera, pa nan hungado Amy Henao (18 aña), kende tabata envolvi den un accidente di auto diabierna marduga y ta interna den cuido intensivo na Hospital, den un estado critico. Su mama, Elizabeth Jansen a gradici e organisacionnan di futbol pa e atencion special aki y na tur cu a presenta na e misa pa hunto resa pa sanacion di su yiu muhe.

E mama a conta cu e ta bayendo cu hopi fe den Dios y pesey mes e ta pidi henter pueblo di Aruba pa ora pa su yiu. “Amy ta hopi special, si e por yuda Bo e ta yuda Bo, ken cu e por yuda e ta yuda, e tin un curason masha bunita, grandi, e ta un mucha masha sabi, e ta atento, ta pendiente di tur cos y e tin tempo pa tur hende un poco, e ta un mucha cu un curason maraviyoso”, asina e mama a conta nos despues di e sirbishi di misa. “Mi ta pidi Dios cuid’e y ward’e pa mi y cu e lo bin bon bek Aruba”.

Famia, amigonan y futbolistanan a uni den oracion pa sanacion di Amy Henao

Famia, amigonan y futbolistanan a uni den oracion pa sanacion di Amy Henao Mas info: https://24ora.com/resando-y-pidiendo-dios-pa-sana-amy-henao/

Posted by 24ora on Sunday, January 26, 2020

Elizabeth Jansen a conta nos cu e situacion actual di Amy ta stabiel. Esey no kiermen cu e ta for di peliger, sino mas bien e ta stabiel pa por biaha. “Actualmente nos ta wardando un ora pa otro pa biaha, sea awenochi of mañan mainta. Esey ta den man di Dios. Su estado ta critico!”

“Mi kier pidi pueblo pa haci oracion pa mi yiu, pa Dios por salb’e y pa duna mi forsa y balentia pa por ta cu mi yiu constantemente. Mi ta gradici pueblo cu ta ora p’e. Mi ta pidi hopi oracion pa mi yiu por salba”, asina Elizabeth Jansen a finalisa bisando.