E team ganado di 48 Hour Film Project Aruba lo representa Aruba na e Rotterdam Filmapalooza. E aña aki pa prome biaha Aruba ta competiendo como pais na e prestigioso competencia internacional di 48 Hour Film Project.
Fundacion CINEARUBA ta e organisador di e proyecto aki pa Aruba y ta buscando 10 team pa competi pa asina saca e miho short film cu lo bay competi contra e short filmnan di otro pais na Rotterdam. Durante e competencia na Rotterdam, lo saca e ganado internacional y tambe e miho 12 short filmnan lo wordo presenta na ‘Cannes’ e prestigioso festival di cine di Francia.
Tur persona por participa, personanan cu ta menor di edad mester tin permiso di un mayor. Un team por consisti di minimo 1 persona te cu 100 persona mes. Cada team ta wordo guia pa un Team-Leader cu ta e persona responsabel pa yena tur documentonan concerni cu e filmacion y e Team-Leader ta e persona cu lo tin cu entrega e pelicula riba e nochi final.
Riba e prome nochi di e competencia e Team-Leader di cada team lo selecta e genero di e pelicula y lo ricibi e nomber di e personahe, e props y e dialogo cu lo tin cu inclui den e pelicula. Asina cu cada team a ricibi e opdracht, nan tin 48 ora pa traha riba e storia, film e storia y edit e den un pelicula di minimo 4 minuut y maximo 7 minuut.
De e dianan cu ta sigui, un panel di huradonan cualifica lo huzga cada film a base di e criterianan; merito artistico 45%, merito tecnico 30% y cumplimento cu e opdracht 25%.
E pelicula ganado lo wordo anuncia pa medio di un evento unda cu lo presenta tur e short filmnan na un publico. E miho short film di 48 Hour Film Project Aruba lo competi na Rotterdam, pero tambe e lo competi cu e 48 Hour Film Project di Bonaire y Curacao pa saca e miho Dutch Caribbean 48 Hour Film Project short film.
Fundacion CINEARUBA ta buscando minimo 10 team cu lo kier participa na e evento aki cu lo tuma luga for di diabierna 4 di october te cu diadomingo 6 di october. Na e momento aki ta midiendo e interes y personanan cu ta interesa pa participa cu nan team por tuma contacto cu e fundacion via [email protected].
