Rene Herde: Discurso di Gobernador tabata tin su contenido balansa

Parlamentario y alabes vice presidente di Parlamento, Rene Herde, a splica cu e discurso di Gobernador Alfonso Boekhoudt, tabata tin su contenido balansa. E ta haya cu gobernador a tene cuenta y a bisa na cuminsamento di su discurso cu aki 10 dia tin eleccion. Pa Herde ta nifica cu Gobernador a bisa di antemano, cu e ta bay presenta un discurso, teniendo cuenta cu e hecho cu pueblo lo bay papia aki 10 dia. E no a bay bisa mucho cos cu bo por mara gobierno den futuro, locual cu Herde ta haya elegante. Constitucionalmente e ta haya corecto. Si el a duna un relato di kico Gobierno kier haci cu e maneho. Herde ta haya hopi bon cu na comienso di su discurso, Gobernador a referi tambe na e atencion cu ta duna Isla ‘Riba. E convivencia cu e desaster increibel cu Isla ‘Riba, islanan den Caribe a pasa den dje y nos responsabilidad como rumannan den reino y como rumannan di Caribe pa yuda otro. Herde ta contento cu el a referi na esey.
Por lo demas, su discurso tabata basa riba e balansa cu Gobierno mester tin, cualkier Gobierno y cu e Gobierno aki a scoge pa crea den nos desaroyo door di balansa desaroyo economico, desaroyo social, desaroyo personal di hende, oportunidadnan, medio ambiente, un masha bunita discurso.
Hopi tribi, por bisa ta, cu Gobierno a scoge, cual gobernador ta referi na esey, pa realisa e balansa pa medio di metanan di Nacionnan Uni.

Kico esey kiermen
Gobierno, den ehecucion di su metanan di Nacionnan Uni, no ta bay wordo controla solamente door di Aruba, Parlamento di Aruba, prensa di Aruba, comunidad di Aruba, pero tambe internacional, pasobra Gobierno a scoge metanan internacional di Nacionnan Uni pa haci’e. Hopi tribi, ambicioso, pero a wak mas biana cu e Gobierno aki tin metanan hopi ambicioso y contento cu hopi di nan ta wordo realisa. Por ehempel e finansas, Gobernador a papia di e futuro, pero el a bisa si y el a mustra cu cifranan cu segun Herde, el a cita di CFT cu ta bisa cu e reduccion di deficit ta e caminda directo pa reduccion di e debe di e ultimo 31 añanan. Esey ta e esencia di e maneho financiero, e bon caminda cu e maneho financiero ta y cu el a constata esey den un discurso oficial di Gobernador na apertura di aña parlamentario, cu e caminda cu a cana, e pais Aruba a cana, pa reduci deficit, reduci debe, ta e caminda corecto y e resultadonan tey.