Kico ta e forsa mas grandi di Aruba? Hopi hende lo bisa nos playa y lamanan bunita. Otro lo bisa cu ta nos hendenan. Algun lo bisa e echo cu nos ta papia cuatro idioma. En realidad tur e factornan aki y otronan ta haci nos un pais special, diferente, unico.
Un pais cu apesar di su tamaño chikito y sin fuentenan di rikesa tradicional manera oro, petrolio o agricultura, a crece y desaroya hopi mas cu hopi hende den pasado y presente a spera. Apesar di e limitacionnan di tamaño y recurso di nos isla, nos ta un di e paisnan cu mas ta atrae atencion positivo, interes, curiosidad, inversion y hende. Segun mi e essencia di nos forsa y splicacion di nos desaroyo, ta nos habilidad di inova. Nos no tin miedo di cambio. Nos ta haci cambio den tur area si e ta na interes di nos pais y nos hendenan. Nos a y ta deshaci di formanan di traha y haci cos, ora nos ripara cu e no ta duna nos e resultado cu nos kier. Nos ta cambia cos ora nos descubri of inventa uno cu ta duna mas y miho beneficio pa nos pais y tur nos hendenan. CAMBIO Ta asina nos a deshaci di e sistema bieuw di cuido medico. Nos tabata tin uno cu un parti di trahadornan den sector priva y empleadonan publico so tabata tin cuido medico sigura. Resto di pueblo mester a pidi un fabor politico pa haya cuido di nan salud. Nos a cambi’e pa uno cu tur hende tin e mes un cuido. Ta asina nos a deshaci di e sistema bieuw di duna beca na 40 hoben via desicionnan politico partidista, pa un sistema di fiansa pa estudio. Enbez di e 40 studiante so pa aña, for di 1986 tur aña mas cu 250 studiante ta bay studia den exterior y otro 500 ta sigui studia aki na Aruba mes. Nos a kita e previlegio di politiconan pa baha cu pensioen na 45 aña y regla den ley cu nan ta baha cu pensioen na e mes un edad cu resto di Pueblo. Nos a inova nos turismo ora e refineria a sera y crea henter un industria cu miles di cupo di trabou, cu no tabata tin prome. Nos a kibra cu e concepto politico bieuw di haci fabornan politico y regla cosnan pa famia y amigonan so (“friends and family”). Trato igual. Ley pa un, ley pa tur ta loke ta conta awor! A kibra cu e pensamento bieuw cu si bo ta pober ta bo mes mester yuda bo mes of depende di bondad id otro. A remplasa esaki pa e pensamento cu hunto den e pais aki nos ta wak pa otro y cuida otro. Pesey esnan cu entrada mas abou, mamanan soltera y jiunan di famianan cu poco entrada ta haya atencion structural awor. Pesey nos no por compronde cu ainda tin partido politico cu kier hiba nos pais bek pa e tempo di pasado yen di desigualdad y division. Anto nan ta bis’e “sin miedo”!
NUNCA MAS
Nunca mas nos kier bay bek na e tempo cu den conseho di partido MEP nan ta dicidi ta ken su jiu ta haya beka pa bay studia. AVP a introduci e sistema di fiansa pa estudio pa tur hoben cu por y kier, por bay studia e profesion cu e ta desea. Nunca mas nos kier bay bek na e situacion cu un ciudadano tin cu bay serca un politico pa haya un carchi como fabor politico pa haya cuido di su salud. AVP a introduci e AZV pa sigura tur hende e mes un derecho pa cuido di su salud. Nunca mas nos kier bay bek pa e situacion cu ta “famia y amigonan” ta haya tur posicion y contract den gobierno. Tur hende mester keda cu e mes un derecho y oportunidad manera ta e caso awor. Nunca mas nos kier bay bek na e situacion di desempleo manera tempo cu e refineria a sera. Ampliacion y profesionalisacion di turismo, creasion di sectornan di economia rond di energia renovabel y uso di tecnologia avansa den enseñansa, den agricultura y den crea servicionan nobo, ta e rumbo cu nos a scohe y cu ta duna resultado den otro paisnan y na Aruba. Nunca mas nos kier bay bek na e situacion cu ta ridiculisa institucionnan di nos pais djis pasobra no gusta nan opinion. Nunca mas nos kier bay bek na e situacion cu ta core hende cu a scohe Aruba como nan pais, djis pasobra nan a pidi trato husto. E miedo pa cambio y inovacion cu MEP ta bolbe hinca den hende, e division den pueblo cu MEP ta bolbe sembra, lo hiba nos bek pa un tempo y un pais, cu un majoria grandi di pueblo no kier mas. Specialmente hobennan ta bisa NUNCA MAS! AVP a y lo sigui busca formanan di renoba nos pais, den enseñansa y economia, den finansa y organisacion di gobierno, den cultura y arte, den cuido medico y cuido di nos naturalesa. AVP lo sigui renoba pa nos pais ta e miho luga pa biba pa nos tur!
