Sindicatonan TOPA y SEPPA ta na mesa cu minister Bikker, pa loke ta trata e maneho di e management team di Imigracion. Presidente di TOPA, Rene Bernabela a comenta cu si no tin un solucion pa e formatierapport, mirando e hecho cu e management team ta bay haci casi un aña y no a bin ainda cu un solucion, e ta mira den e sentido cu por separa e departamento di Guarda nos Costa for di Imigracion, lag’e bira un departamento autonomo y haci e departamento di Imigracion tambe riba su mes.
A bis’e cu esey ta e unico manera cu por tin un solucion. Si esey no ta e caso, mester bisa Trudy Hassel pa e tuma un decision. Hassel a bin cu cierto ponencianan den e formatierapport, caminda cu e kier bin cu zijinstroom, kier cambia e posicion di nombracionnan di 1ste y 2de medewerker, caminda cu e sindicatonan no ta bay di acuerdo cu e cambionan aki. Pesey a bisa minister Bikker, of sindicatonan ta sinta cu departamento di recurso humano y nan mes ta caba cu e concepto pa loke ta e formatierapport, of Hassel tin cu coopera cu e sindicatonan y ministerio di Husticia, pa por finalisa e rapport aki, of minister Bikker mester disolve e management team aki y nombra otro persona pa esaki.
TOPA y SEPPA na mesa cu Gobierno : Tin tension na Migracion Aruba
Posted by 24ora on Monday, May 20, 2019
A traha na diferente departamento
Tur caminda cu Trudy Hassel a traha, ta problema so tabata tin y Minister Bikker ta bon na altura di e trayectoria di Hassel. No ta algo cu sindicato mester bolbe lees voor pa e minister. Minister Bikker sa perfectamente kico ta kico pa loke ta e management team cu el a nombra na e momentonan aki. Pesey a bisa tambe cu e decision ta den man di minister Bikker. Pero no por ta asina cu tur siman tin presion, tension riba empleadonan di imigracion. Ta papia di un manera onbeschoft, no corecto cu e trahadonan di Imigracion y ta kere cu e trahadonan ta bay keda keto y acepta e abuso verbal cu ta tuma lugta na pia di trabao. TOPA ta duna espacio pa minister Bikker yega na un solucion. Mas cu logico e solucion aki lo mester yega na un final dado momento.
Si Minister Bikker no kier yega na un solucion, no ta keda e sindicatonan nada otro pa busca e solucion pa minister Bikker, pa por finalisa e formatierapport aki.
Cuanto trahado
Rene Bernabela a splica cu Imigracion ta consisti na e momentonan aki entre 60 pa 70 empleado. Tin cu agrega cu e parti di Guarda nos Costa, no a cuminsa for di e trayecto na comienso di e formatierapport. Te den ultimo e departamento di Guarda nos Costa a bin acerca pasobra nan a dicidi cu nan kier uni cu e departamento di Imigracion. Manera tur hende ta corda, departamento di Guarda nos Costa tabata resorta bao di e Cuerpo Policial. Ta na ultimo momento nan a dicidi cu nan kier uni. E ora a purba di merge e dos departamentonan aki na otro. A compronde awor aki hasta bao di e empleadonan propio di Guarda nos Costa, tin di nan ta bisa cu nan tampoco ta desea e manera di trato di e management team.
Palabra ta na minister Andin Bikker, pa e bin cu un solucion pa e problema, e tension cu ta reinando na e momentonan aki bao di e empleadonan tanto di Imigracion aeropuerto y na Barcadera. No por keda tur siman den e mesun problemanan aki. Si minister no por saca su conclusion, sindicatonan ta haya nan forsa e ora pa saca un conclusion den e caso aki, na nomber di Minister.
Proximo reunion
E proximo reunion lo ta e siman aki, diaranson awo, dia 22 di Mei. Ta aki ta caminda cu minister lo tin cu bay duna un contesta riba tur e kehonan, cual ta un total di 5 pagina, empleadonan a formula, cu nan a entrega e minister.
E minister mester bay duna contesta riba tur e kehonan cu a wordo entrega y ta kico ta bay ta e solucion di tur e kehonan aki. No solamente e management team ta un problema. Tin un problema tambe di un hefe cu e management team a nombra como hefe di IT. Na e momentonan aki, e hefe di IT a dicidi, hunto cu management team, di kita tur acceso di locual ta e analistanan cu tin cu traha riba Radex. Motibo cu nan a duna ta, pasobra tin un investigacion ta tumando luga.
Si no tin sospecho of tin un sospechoso den e investigacion, con por ta posibel cu acceso di computer ta wordo kita y no por haci trabao. Den regla di gobierno ta bisa cu si un persona ta sospechoso, e ta wordo manda cas, te ora cu e investigacion termina.
Esey no ta e caso di analistanan cu ta trahando cu Radex. Es decir a kita nan acceso di tur computer, cu nan no por traha cu nan. Awo ta bisa cu nan ta trahando na trabao y a wordo geschors. Tin un situacion no solamente pa loke ta e managment team, pero tambe pa loke ta e hefe cu a wordo nombra, cu ta encarga cu IT.
Tin cu agrega, cu e persona aki, ni ambtenaar e no ta. E ta un arbeidscontractant. Esey tambe ta puntra minister Bikker, desde cuando un arbeidscontractant por duna instruccion na un ambtenaar. Si bay busca den LMA, ningun caminda esaki ta existi, unda cu un contratista por duna instruccion na un ambtenaar. Pero toch e ta tumando luga na e momentonan aki na Imigracion. Ta problemanan serio cu ta tumando luga.
Tin un situacion sumamente penoso na Venezuela. Tin problema cu asunto di asilo politico, refugiadonan, etc. Y tin un situacion caminda personal di Imigracion ta trahando bao di tension. E punto final tin cu yega. No lo por sigui tolera e situacion aki ningun dia mas.
Deadline
Si en caso cu no tin un decision final, Bernabela a splica cu e situacion ta locual cu nan ta aden, ta uno di dialogo cu minister. Como sindicatonan responsabel, nan ta opta pa sinta dialoga cu minister pa yega na un solucion pacifico. Pero palabra ta keda na Gobierno of den e caso aki, minister Bikker. E problema no ta sinta na banda di e trahadonan di Imigracion of di e sindicatonan. E problema ta sinta di parti di e management team, caminda cu minister Bikker a nombra e personanan aki. Palabra ta na gobierno pa busca un solucion. Sindicatonan, te na e momentonan aki ta dispuesto pa yega na un solucion. Pero ta bisa tambe, den e mesun rosea, cu si minister Bikker no step up y yega na un solucion, e ora no ta keda nada otro pa e sindicatonan saca nan propio conclusion pa e situacion cu nan ta pasando aden na e momentonan aki.
Si e minister mes a nombra e management team aki, e ora si nan no ta concidi pa e trabao cu nan a bin pa haci, e ora minister Bikker no lo tin un problema pa disolve e management team aki y laga sindicatonan y departamento di recurso humano sigui cu e trabao of, loke ta posibel tambe, nombra otro hende den e management team aki, pa asina por keda cla cu e formatierapport.
Fuera di e formatierapport, tin un batayon di personal cu ta sinta ta warda riba nan promosion, cual tampoco no ta cla. Palabra na minister ta, kende a compromete su mes cu e sindicatonan, cu na momento cu e formatierapport keda cla, tur esnan cu ta pendiente pa nan haya nan promocion, tambe lo ricibi esaki na e mesun momento. Ta puntonan caminda cu a pone e minister responsabel. Na momento cu e formatierapport mester keda cla, tur persona cu ta pendiente pa nan haya nan promocion, tambe lo tin cu ricibi esaki. Sino esaki tambe lo bira un biaha mas un otro problema na e departamento di Imigracion.
