Señor redactor, danki pa e espacio concedi pa nos por trece nos preocupacionnan p’adilanti. Mi ta papiando den nomber di mi tata, kende a bira malo awe mainta. Manera procedura, ta bay dokter di cas prome, pa asina haya un diagnosis di loke e tin y si algo no ta cuadra, ta mande SEH (Spoed Eisende Hulp). Pero pa su desapunto, dokter di warda ta tuma solamente 40 number y e luga tabata yen. Mi tata no por a wanta e dolor mas y for di eynan caba nan a bise, pa bay poli, pa asina e por wordo atendi, cual nan a haci tambe.

Mi mayornan a bay SEH, a registra y despues di un rato cortico nan a yamanan bin aden pa triage. E zuster di triage, no sa si e tabata tin mal beis of por ta e lo a trapa un clabo, pero e tabata tin un actitud asina hastro, cu dado momento mi mama, kende ta un persona cu tambe ta sufri di curason, a cuminsa shangrina.

“Kico bo a bin haci aki,” ta loke e zuster Hulandes a puntra mi tata. El a splik’e kico e ta sinti, cu ta for di cuater dia pasa caba el a bay dokter pa su malestar, pero awo e dolor a bira mas fuerte, cu el a bay na e dokter na warda, cual a verwijs’e. E zuster a bolbe puntre cortando su palabra “ba bay bo dokter di cas?” Na luga di haci e triage, e zuster tabata gewoon cuestiona kico mi tata a bin haci. Finalmente nan a duna mi tata dos paracetamol plus un voltaren, cual no a yuda cu nada. Na porta, e bewaker a puntra mi mayornan si ta tal zuster Hulandes, y nan a contesta cu si. E bewaker a bisa cu tin hopi keho caba riba e zuster aki, cual aparentemente ta un persona cu mester a baha cu pensioen caba, mirando cu ya e tin un trayectoria. Awe tardi nan ta bay atrobe, ban wak. Nan kiermen, e bali so no mester di e glas dilanti, pero triage tambe, pasobra e manera con nan ta wordo trata den triage, ta insolito.

E trato cu e hendenan ta ricibi, ta haci cu nan ta bira asina agresivo. Ta comprendibel cu mester warda na dado momento, pero si papia cu e pashentnan trankilo, tur hende ta keda ‘even goeie vriendjes’. Pero si mester bin papia na un manera fresco, manera hende fada, spera contesta no mucho nechi den nan direccion.

Nos enfermeronan por ta hende studia, pero tin algun di nan mester les di etiquette y manera pa por siña trata hende manera hende y no manera bestia.

Nomber y adres conoci na redaccion

Comments

comments