E cantidad di propietario cu ta solicitando sex for di nan huurdo pa vivienda ta creciendo, door cu cierre di negoshinan genera p’e pandemia di Coronavirus a laga hopi persona cu problema pa paga nan huur, segun expertonan. Un sondeo di Alianza Nacional di Vivienda Husto (NFHA na Ingles) den mas di 100 grupo di vivienda cu ta combati e discriminacion di Merca a topa cu un aumento di 13% di keho pa acoso sexual durante pandemia di Coronavirus.
“Si no tin relacion sexual cu ne, e lo a saca mi afo,” NFHA a bisa den un publicacion di e grupo riba nan website over un muhe cu tabata topando cu e riesgo di wordo saca di cas door di administrado di e propiedad. “Door di ta mama soltero, mi no tabatin opcion. Mi no kier a perde mi vivienda.” Den e ultimo añanan relacion sexual pa huur ta creciendo na Merca y Britania. E organisacionnan benefico a resalta un aumento den e anuncionan riba internet di oferta gratis di estadia na luga di fabornan sexual.
Bou e pandemia nobo Coronavirus, miyones di persona rond mundo a perde nan trabou of nan entrada segun e cuarentenanan y restriccion di biahe a obliga hopi empresa cera. Autoridadnan di Noord America y Europa a desplega beneficionan cash pa hendenan, a vries huur y prohibicion di desaloho purbando di proteha personanan di keda sin cas. “Esnan realmente vulnerabel ora di enfrenta un desaloho, specialmente durante un pandemia, tin biaha ta enfrenta decisionnan imposibel,” Morgan Williams, asesor general di NFA, cu ta protege e huurdonan contra discriminacion di vivienda, a bisa.
E datonan di casonan di relacion sexual pa huur ta poco. Cu un consciencia limita riba e tema, manera e tema legal, no ta mucho cla e consecuencianan cu e victimanan por enfrenta cargonan di prostitucion, ta haci cu hopi biaha no ta denuncia e abusonan, segun e expertonan di vivienda. Un sondeo realisa den 2018 p’e organisacion benefico di vivienda Shelter England a haya alrededor di 250.000 muhe den e pais cu a pidi nan haci fabornan sexual a cambio di huur den e ultimo cinco añanan.
Wera Hobhouse, un legislador Britanico cu ta haci campaña contra “sextortion”, e abuso di poder pa beneficio sexual, a bisa cu probablemente sex pa huur lo aumenta, ya cu personanan desesperadamente kier mantene un cas. “E dificultad financiero cu hopi den Reino Uni a experimenta door di COVID-19 ta significa cu mas persona ta obliga di acepta e areglonan ey como alternativa pa keda sin luga den e pio momento posibel,” Hobhouse a bisa.
Williams di NFA a bisa cu hopi hende muhe no lo denuncia e acoso sexual di parti propietarionan cu miedo di perde nan vivienda of tabata lucha cu otro problemanan, manera pobresa. “Keho den e situacion actual ta dificil.”
