E Arubiano, Reinier Koole, di 42 aña di edad, ta enfrentando acusacion serio di lo a cende un trailer na candela den e area di Palm Springs luna pasa, tambe ta acus’e di asesinato. Diahuebs santo, durante un audiencia den Corte na Merca, e hurado a repasa e acusacionnan di incendio provoca, asesinato y robo arma den e madruga di dia 29 di Maart ultimo den Mark-Mak Colony Park y e asesinato di Ramon Eduardo Herrera-Moradel, di 33 aña.
Ora cu Brandweer di e condado di Palm Beach a yega pa paga e candela, nan a topa cu Herrera-Moradel morto dilanti di e cas. El a wordo hinca mata, autoridadnan a bisa. A haya un punta di flecha kibra den su brasa durante autopsia. E tipo di flechanan asina por uza cu un crossbow.
Autoridadnan a haya e ID y cartera di Herrera-Moradel den auto di Koole, cual Koole a afirma cu a wordo poni eyden pa set’e up. Su amigo a bisa e recherchenan cu el a wak’e un arco y flecha den e bahul di e Nissan color blanco di Koole.
Un homber cu tabata biba den e trailer y a pasa tempo cu Koole y Herrera-Moradel, eynan laat dia 28 y tempran di mainta di dia 29 di Maart, a conta autoridadnan cu a cuminsa un disputa ora cu Koole a coy un boter di biña di Herrera-Moradel. Koole a lanta su flanel y a mustr’e cu e tabata tin un arma di candela, e homber a bisa.
E comportacion di Koole a bira cada biaha mas violento ora cu un grupo di persona den e residencia tabata uza cocaina, bebida y tabata hunga carta, testigonan a bisa. Ora cu algun a dicidi di sigui bebe na un bar, Herrera-Moradel a opta pa keda atras y drumi den su auto para dilanti di e trailer. Koole tampoco no a bay e bar.
Un otro residente di e trailer, kende a keda den su camber durante di e fiesta, a conta Polis cu Koole a cuminsa bati na su porta di camber bisando, “tin un homber morto dilanti.” E homber a bisa cu el a scucha Koole despues core den e gang y despues a bandona e luga.
Ora cu e homber a habri e porta di camber, el a nota cu e camber di su compañero tabata na candela. Autoridadnan a haya un jerrycan di gasolin cerca. Koole a confirma cu el a regresa e cas, pasobra cu e residente, kende tabata na e fiesta, debe placa, asina ta el a coy e slopi di cusinchi di e homber, cu tabatin 40 mil dollar cash. El a nenga di a cende candela.
Koole, ta naci na Aruba, tabata bibando na Delray Beach, segun registro. E ta cera den e prizon di Palm Beach County, sin posibilidad di un fiansa mientras cu su caso ta andando den e sistema hudicial.
