Desde Januari Respaldo a tuma e Clinica di hospital over y ta realisando hopi trabou pa drecha e clinica y dun’e un aire fresco. Un di e proyectonan cu e fundacion a start cun’e ta e herinrichting di e binnentuin di e clinica cu ta enfoca riba deporte, recreacion y relahacion. A acerca diferente artista na Aruba pa haci un mural cu lo duna un bida nobo na e binnentuin. Di e manera aki Respaldo a yega den contacto cu Reginald de Palm, kende tawata hopi entusiasma pa a haci e proyecto aki pa Respaldo.
Cu su conocemento di e efectonan cu color y figuranan por tin riba comportacion di hende, el a propone un mural y awo por admira esaki na clinica Respaldo.
Reginald de Palm a adapta un di su pinturanan pa por a complementa loke a pidi’e. E pintura ta un mundo pinta na 2010, cual ta un otro trabou di dje cu a bay Merca y a gana un premio. El a keda haci uzo di e pintura aki y a keda agrega mas color na e trabou aki. Esaki ta un di e cambionan cu Clinica Respaldo ta haciendo ultimamente. Clinica Respaldo antes tabata conoci como PAAZ.
Clinica RESPALDO ta situa den cura di Dr. Horacio E. Oduber Hospitaal y ta encarga cu cuido y tratamento di pashentnan psikiatrico. Den e clinica tin diferente Specialista y Psicologonan, kendenan hunto cu nursenan ta brinda cuido na pashentnan cu ta pasa pa un cita y otronan cu ta keda un dia of un poco mas largo. Ta importante pa e luga tin un ambiente di paz y trankilidad.
E proceso pa por a yega na e colornan pa pinta e muraya den e clinica, tabata con ta haci uzo di colornan. E ta un luga pa trankilidad, unda a uza colornan suave pero tambe colornan bibo pa keda cu e animo. E combinacion di colornan suave y bibo ta pa relaha. A haci di dos color cu ta e blauw y esaki ta refleha trankilidad, mientras e color geel ta refleha energia. “Na un banda bo por trankil y otro banda bo mester tin energia tambe pa biba,” el a expresa.
Rond di e colornan tin e mundo cu tur pais, tur hende por bin hunto y papia di cua pais nan a bay si nan a yega di biaha of si kier biaha. Tambe por papia di esaki den nan mente, unda den un combersacion nan por bisa cu nan ta na Italia por ehempel y ta mira e pais aki riba e mundo pinta. Tin e parti di colornan manera un tapijt cu ta bula cu diferente color. No di unda bo ta ni kico bo ta representa, pero hunto ta forma un capa cu ta liber. Esey ta loke e ta nifica y e pintado ta kere cu ta mira un arte y ta sinti esaki. “E artista ta pone su idea riba e muraya y abo como un publico ta bay sinti kico e artista kier pa bo mira”, el a expresa. Tambe e ta activa e sentimento di un persona p’e mes identifica e trabou cu tin dilanti dje.
Esunnan cu ta kedando na Respaldo ta curioso. E prome dia nan a papia di esaki y a duna nan sugerencia kico pa pinta. Un di e personanan cu ta keda eynan a pidi Reginald de Palm pa pinta un parha hopi grandi, pero e pintor tabatin un diseño caba y a opta pa algo cu ta bula. Probablemente den su forma di mir’e, kende lo sinti cu e pintor a haci uzo di su idea.
E tabata pinta den dia y pa anochi e personanan tabata mira e pintura y analisa esaki. Nan tabata duna comentarionan y mainta Reginald de Palm tabata ricibi feedback. E tabata un proceso cu e mester a tene cuenta cu e deseonan, manera ora nan a bisa cu falta Aruba riba e mundo y mester a pinta esaki pa nan. Tabatin hopi interaccion pa cu e muraya y cada momento nan tabata analisa y bisa kico nan ta mira. E tabata interesante pa por a forma parti di esaki.
Pa Reginald de Palm, e no a pinta simplemente un muraya pero e tin su efecto di cual hendenan ta papia y disfruta di dje.
