Desde algun siman caba a start cu distribucion di cobransa riba impuesto di propiedad, conoci como Grondbelasting. Parce cu den e Reforma Fiscal anuncia pa Gabinete Wever-Croes, a haci cambio den e formula di cobra y supuestamente a haci’e mas social y lo a reduci e impuesto pa un gran cantidad di doñonan di cas. Pero e realidad ta mustrando diferente y e kehonan cu ta scucha eyfo ta hopi. Ta mustra cu e efecto a causa mas daño y a traduci den un aumento di impuesto enbes di lo a bira un alivio pa hopi hende.
A nota cu Departamento di Impuesto a yama un conferencia di prensa pa diahuebs mainta mes, pa papia riba e impuesto specifico aki pa e aña aki. Sin duda lo tin hopi pregunta pa contesta, specialmente pasobra asina tanto hende ta kehando di e forma con a aumenta e impuesto.
For di un Fiscalista nos a compronde cu un di e cambionan drastico di Gobierno, den e Reforma Fiscal, ta cu a elimina e deduccion di 60 mil florin for di e propiedadnan. Pues, si acaso bo cas bal 260 mil florin, nan ta cobra Bo belasting pa 200 mil so. Pero den e cambio, awor ta cobra Bo pa henter e 260 mil florin. Pues, aunke cu kisas a baha e porcentahe di e cobransa, e suma di cual ta cobra a subi pa tur hende cu 60 mil florin!
Hopi ta puntra nan mes si Departamento di Impuesto a recalcula e propiedadnan riba Aruba, cu lo por a causa cu a adapta y hisa e balor di casnan riba nos isla. Hecho ta cu a traha varios bario nobo, a percura pa hopi trabou di urbanisacion, bashamento di asfalt y instalacion di klinker y luznan di caya elegante. Tur e cambionan aki financia pa Gobierno, ta traduci automaticamente den un aumento di e balor di propiedadnan den vecindario, cu consecuencia cu awor e ta refleha tambe den e cobransa di Bo Grondbelasting.
