Na e momentonan aki Aruba tin presion di Hulanda, di CFT, cu ta keda insisti cu gobierno di Aruba mester bin cu mas medida, y hasta, ta menasa cu aanwijzing. Segun prome minister Evelyn Wever-Croes, apesar cu e gobierno Hulandes ta admiti cu ta bayendo bon, ta cumpli cu normanan y tur cos ta indica cu lo cumpli cu palabracionnan, toch ta keda menasa cu tipo di aanwijzing asina, pasobra talbes otro aña no lo por cumpli cu e normanan.
Pero gobierno ta diferencia di opinion. A scoge pa busca alternativanan pa cera e gap financiero, enbes di solamente medida. E prome minister ta compronde si e presion cu Hulanda y CFT ta pone riba nan. Nan ta referi hopi na nan preocupacion cu nan tin pa loke ta e debe halto di pais Aruba di casi 90% di GDP y tur ta preocupa cu esey.
No ta husto, e mandatario a bisa, pa tuma medida riba lomba di pueblo pa bay paga e debe aki cu ta gobierno anterior a crea y redobla cu a causa cu ta hinca Aruba den problemanan financiero.
E preocupacionnan, ta concentra riba dos area. Un di nan ta e crisis plan social y gasto di personal. Prome Minister a splica pakico a scoge pa e crisis plan social pa ta den un fondo separa. A bisa cu ta pone e ser humano central, “sa cu no tin problema social na Aruba, pero tin explosion social na Aruba. Pa por atende cu e explosion social aki, mester a pone fondonan un banda pa e minister encarga cu e explosion social por tin su tempo pa por atende cun’e, mientras cu e demas ministernan ta busca pa atende cu e problemanan financiero di e pais.”
E mandatario a sigui splica cu si a laga e fondo aki den un presupuesto, e placa no lo a yega nunca pa atende e dolornan social den comunidad y nan no ta hende cu ta haci un cos papia otro cos. A bisa cu lo pone e ser humano central y p’esey a pone esaki den un fondo apart. Nan preocupacion di gastonan personal, e gobierno ta comparti y nan ta haciendo lo maximo pa por cumpli cu e normanan di personal. Manera cu CFT a bisa, ta mustra cu e aña aki na lo logr’e tambe.
E di dos aspecto cu nan ta preocupa cun’e ta entradanan di belasting cu no ta cubri full e gap financiero. No ta belasting so ta bay cubri e gap financiero pa por yega na surplus, segun e prome minister. Belasting a cubri e gap financiero pa por a yega na un balanced budget, pero pa e surplus ta kere den alternativanan economico y no medidanan. Esaki ta un tema tambe hopi importante pa gobierno.
A base di e puntonan aki, ta pone presion riba gobierno, cu Aruba no ta di acuerdo cu nan. Prome minister ta sigura tur ciudadano cu nan lo bringa esaki si yega asina leu. Pa gobierno ta importante pa sigui mustra cu ta cumpli cu e normanan, pero ta pone e ser humano central. Ta tene cuenta cu e dolornan cu tin den comunidad.
E hecho cu ta den e proceso pa haya e yabi bek di e refineria y specialmente e terminal, esaki no por a yega na un miho momento. E bon noticia di e MoU ta yena gobierno di e siguridad, speransa, cu lo bay logra tambe yena e gap financiero cu desaroyo economico y no solamente cu belasting.
