Reduccion substancial den prijs di awa pa cunukero y criador di bestia

For di aña 2018, Ministerio di Sector Primario, WEB Aruba NV y Santa Rosa a firma un protocol cu e proposito pa traha riba un roadmap, cu lo a sirbi como guia pa yega na un alivio pa e contratempo cu awa pa nos productornan local, mediante un cooperacion entre WEB y Santa Rosa. Minister Romero a duna di conoce cu “mi ta sumamente complaci pa anuncia cu durante un reunion den Conseho di Minister, Ehecutivonan di Utilities Aruba, WEB Aruba NV, DIP y Santa Rosa a wordo invita pa presenta e resultadonan y solucionan positivo, pa por duna un miho sosten na nos agricultornan. Di e manera aki ta wordo anuncia cu Gobierno di Aruba a logra un reduccion di awa na un tarifa di Afls 5,50 pa meter cubico pa esnan cu ta registra na Santa Rosa”.

Esaki tabata un trayecto cu a tuma su tempo, como cu mester a compila varios datos y haci diferente estudio pa saca afor cua lo ta e miho opcion pa nos productornan. Tin un interes enorme den nos comunidad pa planta y pa cu esaki ta importante pa sigui stimula y sostene nos agricultornan caminda nan tin mester.

Minister Chris Romero a termina bisando: “Mi tin cu gradici nos Prome Minister y Conseho di Minister completo pa e sosten pa por a logra haci e proyecto di awa pa agricultornan un realidad. Mi ta sumamente contento cu e logro aki y nos lo sigui traha di serca cu Santa Rosa, pa por realisa mas proyecto di concientisacion, educacion y control pa por sigura un Sector Primario di calidad.”