Diasabra ultimo, den un programa cumpra via Radio Hit 94, partido politico RED Democratico a aclaria nan punto di bista riba Cannabis (marihuana). E lider di e partido, e di trea votegetter di Aruba despues di Mike Eman y Evelyn Wever-Croes, a enfatisa cu pa discuti riba e tema di legalisacion di Cannabis, sea ta recreacional, spiritual of medicinal, ta rekeri bon conocemento, investigacion y educacion di parti esunnan cu mester tuma decision. E ta referi aki entre otro na Minister Dangui Oduber, encarga cu maneho di Salud Publico riba nos isla.
Locual mas a hala atencion durante e programa radial ta e vision di e partido politico di 1 asiento den Parlamento. Ricardo Croes a confirma cu RED no ta boga pa legalisacion di Cannabis medicinal pa importa nada di afo. Mas bien nan ta sali for di e punto di bista cu lo cultiva Marihuana na Aruba y lo exporta pa otro pais, pa e por bira un pilar economico di nos pais. Tambe pa kita e stigma cu tin riba e humadonan di marihuana riba nos isla. Croes ta kere cu alcohol ta haci mucho mas daño, compara cu Cannabis.
