RED Democratico a tene nan conferencia di prensa pa asina duna nan reaccion riba Presupuesto 2023. Ta mira cu historia ta ripiti bou gobernacion di MEP pa loke ta trata presupuesto.
mr. Ricardo Croes, lider di RED Democratico, a splica cu tratamento di presupuesto y tur ley tin un procedura ancra den constitucion. E presupuesto mester pasa Directie Wetgeving, bay Raad van Advies pa nan duna conseho y despues trata den parlamento tanto di gobierno como e parlamentarionan hunto. Y asina por participa, pa por satisface e exigencianan den constitucion p’e trahamento di e leynan cu ta conta pa tur hende.
E presupuesto ta un di e sortonan di ley yama landsverordening. Den e tratamento di presupuesto aki, gobierno a presenta un nota di cambio. Un biaha mas esey ta significa cu e presupuesto mester bay bek Raad van Advies pa haya un conseho y despues trata den parlamento un biaha mas. Esey no a tuma luga y e ta contra constitucion. Segun Croes, despues cu esey a tuma luga, ta resta solamente un persona cu te ainda mester firma pa aproba e presupuesto aki. Of e ta keda sin firma pa no aproba y esey ta Gobernador di Aruba. Den pasado gobernador a yega di nenga firma un presupuesto, tabatin yen manifestacion. E ex-prome minister Eman a welga di hamber, etc.
Awo tin un situacion caminda cu a presenta nota di cambio, pero no a mand’e bek Raad van Advies pa cumpli cu locual ta ancra den constitucion. Esaki no ta prome biaha cu e ta tuma luga. Pasobra den pasado esey a tuma luga y partido RED Democartico ta conclui cu e mesun actornan cu a haci esey den pasado, ta e mesun nan cu awo ta den parlamento tratando e presupuesto. E ta algo cu no por ta acepta. RED Democratico ta desea pa gobernador pone atencion riba esaki, defende y para p’e constitucion. Y pa ningun momento permiti algo asina tuma luga.
Tempo cu dr. Rudy Lampe, miembro di RED Democratico, tabata den parlamento, a tuma luga e mesun modus operandus. Lampe a indica cu nan ta sosten publico n’e Institucion di Gobernador p’e para firme pa e principio di bon gobernacion. Loke a pasa tabata un acto di mal gobernacion y historia ta ripiti, pero nan no kier p’e ripiti manera el a pasa den pasado.
El a indica cu e mesun partido MEP bou gobierno absoluto na aña 2006 pa mesun asunto di BBO, a haci e mesun cos. Nan a bin c’un nota van wijziging y ora di aproba e ley di BBO, nan a argumento cu “nos constitucion ta bisa ‘na het horen van de Raad van Advies’, nan a bisa cu no ta para ‘na het lezen van een advies van Raadd van Advies’.”
Asina aki nan a bypass e constitucion, unda nan no a manda e nota van wijziging cu e cambionan drasticonan pa loke tabata e ley di BBO na Raad van Advies. RED Democartico e tempo ey a manda un carta fin di december p’e Minister di Hulanda cu tabata regarda e asuntonan di Aruba y inform’e cu a aproba e ley di BBO anti constitucionalmente.
Pa mas lesa TREMPAN.COM.
