No ta prome ni di dos, sino sigur di 3 of 4 biaha cu partido RED ta haye confronta cu un situacion den cual su partner(nan) den coalicion no ta para banda di dje den su ponencia. Ta parce cu tur reunion atrobe, mescos cu un di CITGO algun siman atras, cu Parlamentario Ricardo Croes ta purba pasa un mocion Pro Cannabis.
E biaha aki ta den e reunion publico di Presupuesto 2018 den cual e ta purba pone presion riba Gobierno pa keda cla cu e estudionan mas pronto posibel.
E reto ta cu e Parlamentario, cu ta den e top 5 di politiconan cu mas voto na Aruba, kier pusha un mocion basa primordialmente riba dos punto specifico. E prome ta cu kier kita discriminacion den “drug test” riba Marihuana. Manera ta conoci, si Bo uza cocaina ayera y bo test awe, nan lo haye den bo sanger. 
Sinembargo, segun e Parlamentario, cu abiertamente e admiti di ta un uzado di Marihuana te awe, cu den caso di Cannabis e droga ta permanece te cu 2 luna mes den bo sistema. E ta considera esaki un forma di discriminacion contra Cannabis, den comparacion cu otro tipo di droga. E kier pa, via un mocion na Gobierno, pa elimina e discriminacion aki na momento di haci un test di droga.
E di dos parti di su mocion ta basa riba e investigacion cu cada partner den coalicion ta haciendo independientemente tocante introduccion of mas bien legalisacion di cannabis medicinal. E Parlamentario ta haya cu e investigacion ta durando demadiado y via un mocion, ta purba presiona Gobierno pa keda cla cu e investigacion aki mas pronto posibel.
Wel, pa e Parlamentario por presenta e mocion, e mester di mas cu simplemente su firma so. Parce e tin por lo menos 5 Parlamentario cu ta dispuesto pa firma cune pa presenta e mocion aki awe diamars durante tratamento di Presupuesto 2018. Pero ningun por sigur’e cu nan lo vota na fabor di e mocion, pasobra e contenido ta bay liña recta contra e ley di integridad cu precisamente MEP ta pushando asina tanto.
Ayera durante tratamento di Presupuesto, e Parlamentario a grita masha den su discurso, cu si e tin cu para su so den e mocion, e lo haci’e. Es mas, el a corigi Minister Andin Bikker cu a bisa di ta na fabor pa investiga e asunto di uzo di cannabis medicinal. E Parlamentario a corigi’e bisando cu den e acuerdo di gobernacion di MEP/POR/RED a acorda cu lo implementa y legalisa e uzo di cannabis medicinal, pues no tin nada mas di investiga awo.
Mas leu, e lider di RED a bisa cu den e mesun acuerdo ta papia di ta contra discriminacion. Den esey e ta haya cu ta discrimina pashentnan cu kier scoge cannabis medicinal como nan remedi pa nan enfermedad. Tambe, e Rastamannan cu dor di nan creencia ta uza cannabis recreacional tambe ta wordo discrimina, locual no por. Pesey mes e ta subraya cu mester elimina e discriminacion existente den e testnan di droga.
Pero aunke e ta mustra asina facil, den practica e Parlamentario ta hayando masha contratiempo pa por haya sosten pa su mocion. Den MEP sigur cu esey no ta e caso. Ora el a ripara e chuerchamento tumando luga di su mesun coleganan di coalicion, a manda yama Minister Rudy Lampe cu a start un lobbymento formal cu oposicion pa mira si nan lo “sostene” e mocion aki. RED kier sigura di tin por lo menos 11 voto na fabor di e mocion aki. Pa nan e legalisacion di cannabis medicinal ta escencial y den e proceso pa habri caminda tambe pa legalisa cannabis recreacional, por ehempel pa evita discriminacion contra “rasta” nan.
Awe ta bira un dia crucial pa e relacion interno den MEP-POR-RED pasobra si e mocion aki no pasa, e lo bira un otro sla mas pa RED. Ya caba e institucion di un fundacion pa reemplasa DPS no a surti, nombracion di un Director nobo pa DPS tampoco no a logra y awor un mocion pa urgi Gobierno pa keda cla pa caba cu e investigacion pa legalisa cannabis medicinal na Aruba tampoco por conta cu apoyo.
Mester tene cuenta cu tin 3 ex-Polis den Parlamento, cu probablemente tin un opinion diferente cu e otronan pa cu legalisacion di droga. Nan sa e problemanan social den comunidad deriva for di e uzo di droga y cu legalisacion lo tin un efecto ainda mas grandi riba e uzo.
Historia di Partido RED
Dr. Armando “Rudy” Lampe a funda partido Red Eternal Democratico (R.E.D) dia 30 di Mei 2003. E mes a fungi como Lider te cu aña 2016, ora a pasa liderazgo over na Ricardo Croes. RED a participa na 4 eleccion, di cual e record den cantidad di voto tabata na 2017 cu no menos di 4166 voto. 
E record den caida tabata eleccion 2013 cu 1209 voto. Ideologia di partido ta “Progreso”. Dr. Rudy Lampe a inicia su carera politico participando na eleccion pa prome bes na aña 2005 y e tempo ey a logra no menos di 2334 riba su nomber. Esey tabata su salida record y nunca mas el a logra surpasa e logro ey! Den eleccion di aña 2009 el a cay den voto te na 1360 voto individual. E trend di caida a sigui den eleccion di aña 2013 unda el a produci 613 voto pa su mes.
Den e ultimo eleccion cu RED a logra crece atrobe, e mes a logra menos voto atrobe, solamente 466 voto riba su nomber. Ironia di bida ta cu tempo Rudy Lampe a haya 2334 el a bira Parlamentario y awe cu el a haya solamente 466 voto, el a bira Minister di Enseñansa. E votegetter di RED e eleccion aki tabata Ricardo Croes cu 3359 voto riba su nomber.
