Sindicato SIMAR a sinta durante atardi na mesa cu minister y mediador di gobierno pa trata e topico recorte di orario. Desde aña pasa e sindicatonan ta den un lucha pa kita e recorte salarial di 12.6%, pero gobierno no a bay di acuerdo cu esey. Pero algun sindicato a propone recorte di orario si no por stop di kita e porcentahe fo’i nan salario.
Josephine Albertus, presidente di SIMAR, a splica cu nan ta den dialogo riba e parti di ehecucion di baha e oranan desde prome di februari cu ta ekivalente na e 12.6%. E sindicato cu ta representa enseñansa, nan kier hacie na un manera mas responsabel cu por. Segun presidente di SIMAR, nan sa cu no por tene tur hende contento y ainda ta riba e parti di dialogo. Awe, mañan y diabierna tin diferente nivel di enseñansa. Awe tabatin kleuter onderwijs, diahuebs ta di enseñansa primario y diabierna ta sigui cu voortgezet onderwijs.
Aki lo splica nan con a yega na e parti di reduccion di ora. E ta reduccion di tanto ora pa dia ta bira tanto ora pa siman, ta bira tanto ora pa luna. Asina aki ta calcula tanto ora pa aña y por bisa cu un persona laborando den enseñansa ta traha 100%. Segun Albertus, 12.6% ta e oranan cu e ta traha y no ta haya pago p’e, y eynan nan ta bay sinta pa mira con ta bay haci cu ne. Enseñansa tin diferente nivel y mester tene cuenta cu diferente factor.
Dialuna ultimo SIMAR a sinta cu e directivanan di scol pa entrega e rapport, pero tambe pa duna informacion. E meta principal ta keda cu e recorte di 12.6% mester ta elimina. Di otro banda e no ta husto cu tanten e no por ta elimina, tin di sigui traha 100% y cobra 87.4%. Pa mas di binti luna e clase trahado den enseñansa a traha 100% y mas, pero a cobra 87.4%. Ta invita tur hende cu ta forma parti di enseñansa pa presenta n’e reunionnan informativo pa haci pregunta y trece preocupacion dilanti. E sindicato ta purba trece algo cu ta aplicabel pa tur veld di enseñansa.
Pa un cobertura mas amplio lesa e edicion di TREMPAN di mañan.
