Recordatorio pa fecha di inscripcion pa Festival di un Canto na nos Himno y Bandera

Comision Celebracion Dianan Nacional (CCDN) bou auspicio di Ministerio di Cultura hunto cu Comision Promove Cultura y Fundacion Cultural di Festival Folklorico ta preparando e ‘Festival Un Canto na Aruba su Himno y Bandera’. 

Festivalnan cu composicionnan di calidad, danki na nos compositornan y presenta cu briyo y talento pa nos cantantenan. Tanto nos mucha, hoben y adultonan ta participa pa engrandece ambos festival dunando asina nan maximo aporte na e festivalnan y nos luna cultural.Compositornan ta bini cu nan miho composicion. Nos ta mira cu aña tras aña nos calidad di cancionnan ta subi di nivel.

Di manera cu e cuerpo di hurado tin dolor di cabes durante e festivalnan aki. Sin laga afo e musico y areglistanan cu ta duna di nan parti tambe e maximo esfuerzo pa enrikece nos ritmo. Un recordatorio ta bay na participantenan cu e aña aki lo tin un solo inscripcion y lo tira lot di ambos festival. Diasabra 16 di februari 2019 entre 6’or pa 8’or di anochi ta tuma luga e inscripcion y lo tira lot pa 08:30 pm na Sandra’s Garden riba Plaza Turismo riba Linear Park. Festival den categoria pre-infantil y infantil lo tuma luga dia 8 di maart 2019.

Esun di pre-hubenil y hubenil lo ta riba 9 di maart 2019. Y Festival di Adulto lo ta diadomingo 10 di maart 2019. E festivalnan cultural y folklorico lo tuma luga riba Plaza Libertador Gilberto F. Betico Croes riba Vondellaan. Dependiendo di e cantidad di inscripcion cu lo ricibi diasabra, comision lo anuncia e orario di festival despues. Ministerio di Cultura, Departamento di Cultura Aruba, Comision Celebracion Dianan Nacional, Fundacion Cultural di Festival Folklorico y Comision Promove Cultura ta invita nos cantante, compositor, lidernan di agrupacion di musica folklorico pa bini na tempo riba e anochi di inscripcion na Sandra’s Garden. Hunto nan ta desea cu e aña aki henter e pueblo di Aruba tanto pa esun di hende grandi y chikito bin apoya nos mucha, hoben , adultonan, bo cantante y agrupacion musical den e gran festivalnan di ‘Un Canto na Nos Himno y Bandera’.