Na 1947 e universidadnan na Merca tabatin algun exigencia escolar cu na MULO nos no tabata haya. Pesey, despues di gradua na Julianaschool, mi a bay Rutgers Prep. School na New Brunswick, NJ pa mi prepara pa drenta Rutgers University e siguiente aña.

Aya mi a aumenta mi conocemento di Ingles, mi a tuma mas matematica y fisica y mi a siña historia di Merca cu tabata un rekisito pa tur cu kier a drenta e Universidad. Pa sport, mi a drenta e ekipo di atletismo pa practica coremento.

E tempo ey ya mi tabata wordo considera un di e muchanan mas rapido na scol. Tempo mi tabata biba na Lagoen di Playa, hopi biaha mi tabata warda te ora cu nan toca e bel pa mi core bay scol y ainda yega na tempo. Durante e lunanan friu na fin di aña e coredonan tabata train “cross country” pa desaroya nos pulmonnan y fortifica nos musculonan di pia. Na cuminsamento di aña 1948 nos a cuminsa train na e stadium di Rutgers University pa nos desaroya velocidad y practica e intercambio di baton den caredanan di estafeta.

E ehecucion di e intercambio aki por nifica un victoria of derota pa un ekipo. Hopi cos por bay malo, pero cu un intercambio eficas, un ekipo por gana hopi tempo. Nos competencianan a cuminsa diabierna april 23 cu un participacion den Penn Relays, na
Philadelphia, e evento atletico di mas grandi na Merca. Miles di participante representando scolnan secundario y universidadnan di tur parti di merca ta bin Franklin Field pa midi nan velocidad, agilidad y forsa den diferente ramo di atletismo. Mas o menos na mitar caminda di New Brunswick pa Philadelphia, Coach Housman a stop na un restaurant caminda nos tur mester a come un steak enorme pa yena nos mes cu proteina. Awendia atletana ta come hopi pasta pa yena nan mes cu carbohydrato pa nan tin mas energia, pero shete decada pasa e pensamento tabata cu e atleta mester di extra proteina.

Pa ora cu nos a yega na e stadion, e cuminda a baha y no a stroba nos di core duro. E team di atletismo di Rutgers Prep. School 1948 Adilanti: Eiseman, Efinger, Turdo, Wright, Diamond, O’Leary, Pope, Lebow, Gumerlock; Meimei: Jay, Fedor, Lavoie, Vierling, Fleming, HARMS, Hansen, Kuhlthau, Horning; Mr. Housman, Coach; Atras: Beaujon (Arubiano tambe, Pole vault), Embury, Allgair, Vasvary, Pursel, Cochran, Moffitt. *corredornan di 4X 400 meter cu a participa na Penn Relays di 1948Na 1948 tabata existi un animacion special den mundo di atletismo. Na augustus lo tabatin e Olympiada na London, e prome Olympiada den 12 aña, ya cu na aña 1944 y 1940 weganan Olympico a wordo cancela pa via di Guera Mundial. Na e Penn Relays hopi di e gran atletanan di Merca a bin Franklin Field pa mustra kico nan por, cu e speransa di wordo escogi pa bay London na augustus. Y naturalmente, miles y miles di hende di henter mundo tabata den e stadion pa mira e eventonan.

Den e ambiente excitante aki, ami, e mucha di Lagoen cu no a cumpli ni 17 aña ainda, a haya mi ta compiti como coredo pa prome biaha den mi bida den e competencia atletico di mas grandi di Merca. Mi cabei ta lanta para ora mi corda e momento cu nos a drenta e stadion gigantesco. Nos ekipo no a bira campeon, pero nos tur tabata contento cu nos a duna un bunita prestacion, y Coach Housman tabatin hopi elogio pa nos esfuersonan. Awe, 71 aña despues, mi ta recorda mi participacion orguyosamente. Ta posibel cu ami ta ta e unico Arubiano cu a yega di participa den un Penn Relays? Mi ta spera bo comentartionan na [email protected]

Comments

comments