Recordando Anne Frank, a recorda su famoso expresionnan

Diaranson a tuma luga e conmemoracion di e natalicio di Anne Frank. Si e tabata na bida, e lo a celebra 90 aña. Pero ken ta Anne Frank?

Anne Frank ta un mucha muhe di descendencia Hudiu, kende a biba na Hulanda, pa ta specifico den Prinsengracht, Amsterdam, durante segunda guera mundial y ta yiu muhe di Otto Frank, kende, contrario na henter su famia, su yiunan y su casa, a keda na bida pa asina conta e storia di nan bida durante y despues di e guera cu a marca bida di hopi hende.

 

Su buki “Het Achterhuis”, a bira un exito mundial, y traduci den masha hopi idioma.
Anne Frank a fayece hunto cu su ruman muhe Margot, den e campo di concentracion na Bergen-Belsen, Alemania na Februari 1945. Pa e motibo aki tambe Plataforma Hobennan Profesional a tuma e momento aki pa reflexiona y recorda tur loke Anne a representa den e resistencia di e Segunda Guera Mundial. Na inicio di e ceremonia den Wilhelmina Park, Rabino Daniel Kripper a haci un oracion na e ocacion aki.

Biografia di Anne

Juan Manuel Kelly di Plataforma Hobennan Profesional a relata e biografia di Anne Frank, con el a lanta na Alemania y debi na rasonnan politico, con nan a yega Hulanda, con nan a sconde den e “achterhuis” of cas patras, te despues cu nan a haya nan na Augustus 1944, unda cu e famia a wordo separa, te cu nan a fayece di Tifus.
Despues di guera Otto Frank a bay bek Hulanda y a bin haya e diario di Anne. Na 1947, e diario di Anne a wordo publica na Hulanda, na 1952 na Merca, haciendo esaki un fenomeno mundial.

Kelly a menciona cu e diario a impact’e como hoben, cu ta mira caminda cu religion tabata algo hopi destructivo, crea diversidad den paisnan, unda cu balornan fundamental ta wordo perdi. Ta pa e motibo aki mes, despues di 90 aña di nacemento di Anne Frank, Kelly a expresa cu no importa loke ta pasando rond dibo, no importa e momentonan dificil cu bo por ta den dje, semper busca felicidad y alegria den momentonan asina.

Un atardi di reflexion

Ex prome minister, Mike Eman tambe a hiba un discurso durante e atardi aki. Ta e responsabilidad di nos tur y tambe e proximo generacion pa tin e recuerdo di e bon cosnan y cosnan cu tabata menos bon den historia di humanidad, wordo recorda semper pa asina nos por sigui cu e bon cosnan solamente y coregi e cosnan cu a bay fout den historia di humanidad.

Eman a gradici e Plataforma pa su empeño pa organisa un evento asina. Hoben y determina pa cambio. Ta asina bunita marca riba e estatua di Anne Frank y Rabbi Daniel cu a haci referencia na dje, cu e hoben aki tabata, den peliger, e miedo cu e tabata tin, no solamente e tabata pensa riba e momento cu posiblemente e lo wordo libera, pero tambe e tabata pensa riba e responsabilidad cu tur hende tin pa loke ta futuro di humanidad. Un bunita frase ta marca riba e estatua bisando cu “ningun hende mester warda pa cuminsa cambia mundo.”
Sigur un atardi cu hopi reflexion mirando con mundo ta awendia y sperando cu e mensahe cu Anne a sa di trece pa nos durante tempo, por causa e mesun impacto cu el a crea antes, por causa awo, e Rabbi a bisa.