E impacto cu e noticia tabatin riba rednan social rond di e grupo grandi di hende cu a paga Clarissa Arrindell nan ticket di entrada pa e concierto di Marco Antonio Solis sin cu nan entrada, a causa cu tin hende a haci denuncia na Recherche.
Dialuna mainta pa merdia tabatin mas hende cu a bay Recherche San Nicolas pa haci denuncia oficial y a base di esaki, autoridadnan a dicidi di presenta e denuncia na Ministerio Publico. Fiscal a base di esaki a dicidi di duna ordo pa detencion. Recherche a invita Clarissa Arrindell pa presenta na warda di Polis San Nicolas.
Na su yegada a mustr’e riba su derechonan y a pasa pa detene. Nan ta sospeche di “oplichting”, engaña hende, esta tuma nan placa y no cumpli cu loke el a priminti. Tur cos ta draai rond di mesanan den concierto di Marco Antonio Solis reserva pa un grupo grandi di hende cu a entrega e pagonan necesario, cu ta casi 70 mil florin.
Su declaracion publico cu el a haci tampoco tabata convincente y a hinca su mes mas den problema, ya cu esaki tabata zona hopi bruha. Na radio el a bisa cu e ta dispuesto pa paga y a cuminsa busca placa pa debolbe esaki.
Clarissa Arrindell ta actual Señora Carnaval y SMAC un dia prome a declara cu nan lo no tuma ningun paso tanten cu autoridadnan no actua. Di e forma aki probablemente SMAC lo mester dicidi si ta kita e corona for di dje.
