Aruba diariamente ta consumi 7 mil bari di producto petrolero reparti entre 50% na Fuel Oil na WEB pa produci awa-coriente y 50% na Gasolin, Diesel y Jet Fuel. E splicacion aki e compania Fuels Marketing & Supply Aruba a duna riba nan pagina di Facebook.
Alvin Koolman, CEO & Managing Director di RdA: “Normalmente bo ta mantene 45 pa 70 dia di inventario, awor aki riba dia 19 di februari ta yega e siguiente cargamento pa abastece 85 dia di Gasolin, Diesel y Jet Fuel”. Di e forma aki Aruba ta garantisa cu no tin problema cu suministro di 3.5 mil bari di Fuel Oil pa WEB pa dia y 3.5 mil bari di Gasolin, Diesel y Jet Fuel pa dia.
E aclaracion aki a bin despues cu riba red social ta purba causa panico inecesario den comunidad. Mester ta cla pa tur hende cu e compania Fuels Marketing and Supply Aruba (FMSA) ta cumpra combustibel riba mercado internacional independientemente di CITGO of PDVSA. E unico relacion aki ta cu FMSA ta almacena e cargacion di combustibel den tanki nan special den e refineria.
E compania distribuidor FMSA ta pertenece 100% na Refineria di Aruba NV cu na su turno ta pertenece 100% di Gobierno di Aruba.
