E proyecto riba su mes, esta CITGO Aruba, no ta coriendo ningun sorto di peliger. CEO di Refineria di Aruba, Alvin Koolman, a enfatisa cu awor tin mas claridad riba e proyecto mes. Si antes bao di e regimen di Presidente Nicolas Maduro, bao di e sancionnan impone dor di Merca, hopi tabata puntra nan mes ta con e proyecto aki lo por sigui, con ta yega na finciamento, etc. Henter e reapertura tabata masha cuestionabel.
Alvin Koolman a mustra cu awo e chens pa e proyecto bira un realidad ta hopi mas factibel compara cu tempo e tabata bao di e regimen di Presidente Maduro.
Deliberando
Di siman pasa tin deliberacion tumando luga entre Gobierno di Aruba, RdA y CITGO Petroleum pa percura cu lo yega na e fondonan necesario pa sigui cu operacion.
A haya autorisacion prome cu e cambio a tuma luga pa seis luna mas di operacion pa caba cu e proyecto “Estimate” fase 2, cu ta necesario pa logra e fiansa. Di e rapport aki lo por establece cuanto e proyecto ta bay costa prome cu fia e placa. Actualmente e suma cu nan ta papiando di dje, ta di 800 miyon Dollar Mericano pa e refineria y 375 miyon Dollar Mericano pa e liña di gas.
Tur hende sa tambe cu door cu e retonan di e regimen Maduro ta bao di dje y PDVSA y CITGO, ta dificil pa haya e cen ey. Nos tur sa tambe cu unabes bin un cambio, e proyecto aki ta bira un di esunnan di mas importante pa Venezuela y pa Aruba.
Un proyecto atractivo
E proyecto CITGO Aruba ta masha atractivo. RdA ta convenci cu e proyecto aki no por wordo para. Un riesgo cu e tin ta cu e ta wordo poni on hold, durante henter e transicion. Esey kier percura pa no pasa. Tur hende sa e importancia di dje. Actualmente tin un tiki menos cu 300 trahado den e refineria. Tin 150 trahando directamente cu e refineria y 150 via contratista, manera security guard, janitorial, te na e parti ingenieria y hendenan cu ta haci servicionan special.
Te awor aki tambe a percura, di parti di RdA y Gobierno di Aruba en particular, pa e parti di financiamento di e parti aki di fase 2 continua y sigur mantene e hendenan local na trabao. Esey te ainda no a haya ningun modo diferente cu esey no ta e caso. Solamente e parti pa percura cu OFAC, cual ta e instancia na Merca, cu ta e Office Foreign Asset Control, compronde pa ta asina. Tambe tin hendenan di e Gobierno di Guaido na Merca, cu ta percura cu esaki lo sosode.
Kico ta pasando internamente
Ta asina cu e grupo cu a wordo avisa cu e trahadonan mester bay cas, ta wardando e parti oficial di gobierno, di OFAC bisa cu Aruba no ta cay bao di e sancionnan. Aruba ta esencial pa e PDVSA nobo. Aruba ta esencial pa e produccion di e crudo pa Venezuela, pa recupera mas pronto posibel. Tur esey pasa, por mira e parti ey ta bin bek normal y e hendenan cu ta bin bek na trabao.
Rumornan
Mester bisa tambe cu tin e rumor cu lidernan sindical a laga sa cu ta pone Aruba plat. E produccion di e productonan petrolero pa Aruba tur ta wordo importa door di FMSA cual ta un compania di RdA. Aruba ta consumi mas of menos 7 mil bari pa dia di producto. 3.5 ta fuel oil di WEB y 3.5 ta entre gasolin, diesel y jetfuel pa aeropuerto. FMSA ta importa nan. Nan ta wordo warda den tankinan cu ta wordo gehuur for door di CITGO.
Alvin Koolman a enfatisa cu tur esey ta bou control, pues no ta compronde di unda sindicato IOWUA awor ta menasa cu un “wild strike” pa pone trabao na peliger. Mester compronde prome e rol esencial di e refineria como upgrader. Si bo compronde e importancia cu e tin pa Venezuela, bo sa cu ta un di e prome proyectonan cu lo wordo sigui. Ta solamente mester percura cu e parti di sancionnan cu tin actual na Merca wordo regla. Tanto na Venezuela como tambe personanan cu Guaido a nombra na Merca, esta Carlos Vechio ta den contacto masha estrecho cu RdA.