RCA aportando na nos comunidad combina cu un Bike Ride pa e muchanan

December ta un luna cu tur hende kier celebra y a mira cu a yega ora pa cuminsa duna bek na comunidad. Duna mas na comunidad. Devon de Veer, representante di RCA, a acerca Fundacion pa Nos Comunidad y a puntra kico RCA por haci pa yuda.

A bin e ora e idea pa uni como club y trece productonan cu e famia tin mester realmente pa por yuda nan pa asina na por celebra pasco y cera aña un tiki mas trankil y por gosa tambe di e dianan di fiesta, mescos cu tur otro hende.

RCA aportando na nos comunidad combina cu un Bike Ride pa e muchanan

RCA aportando na nos comunidad combina cu un Bike Ride pa e muchanan. Click link pa mas https://24ora.news/2YoBBI7

Posted by 24ora on Friday, December 6, 2019

Bike Ride

RCA a bin pesey cu un evento, combinando Sinterklaas cu Zwarte Piet, cuminsando cu un parada di bicicleta pa 5’or y mey pa tur e muchanan. Tin mas of menos 90 mucha di RCA cu lo participa. Y ora yega club, ta clausura haciendo entrega di tur e productonan na e fundacion.

Gradicimento

RCA completo, tur hungado, mayornan cu a yuda, coaches, lidernan y tambe directiva di RCA cu a yuda pa haci esaki posibel y sin lubida e comision di LIFIDA cu ta e motor tras di tur esaki. Tambe Fundacion Pa nos Comunidad cu a tuma e invitacion pa por forma parti di e bunita gesto aki di RCA.

Un ehempel pa e muchanan

Cu e hecho aki ta siña e muchanan con pa duna bek na nos comunidad. Esaki ta un manera mas facil. E muchanan ta mas consciente y ta puntra vooral cu de Veer tin e muchanan chikito, ta duna nan e splicacion. Por ta abo dia 24 di december ta sinta cu bo famia y tin tur cos riba mesa. Y tin otronan no tin. E ora abo a haci’e posibel pa nan tambe por celebra un Noche Buena, Pasco y Aña Nobo, un tiki mas trankil na cas, pasobra esaki ta un temporada cu hopi hende cu no tin e modo, ta lucha con pa haci’e posibel pa e famia, pa e yiunan. RCA a yuda pa haci esaki un tiki mas facil pa nan.

Fundacion Pa Nos Comunidad

Fundaicon Pa Nos Comunidad a ricibi yamada for di RCA bisando directora Gianaika van der Biezen, cu tur e muchanan a colecta pa asina yuda otro famianan, otro muchanan cu ta den necesidad na Aruba.

E ta sigui conta cu e muchanan ta bay haya un Bike Ride hunto cu Sinterklaas y Zwarte Piet, algo leuk pa nan y traha riba teamspirit di RCA, un team cu semper ta destaca den futbol.

Pero awor aki tambe e ta destaca pasobra e ta aporta na nos comunidad, yudando asina esnan cu mas ta den necesidad.

Con ta bayendo cu FPNC

E aña aki e fundacion a haci 10 aña. Nan tabata tin bon proyectonan, unda cu nan a habri un sucursal recientemente. Esaki tambe ta bira mas facil pa e clientenan. E ta accesibel. Eynan nan ta busca nan pakete di luna y tambe nan por busca nan pan y tambe pidi ayudo na trahadonan social.

Tambe e fundacion tin proyectonan grandi, manera Back to School pa tur aña. Tin e Cumpeañero Contento tur luna. Tambe nan tabata tin un Meal Package Event, unda cu diferente compania a forma parti di dje. Tur esaki a haci cu diferente compania y tambe comunidad ta acercando e fundacion, cual ta algo bunita. E no ta pa e fundacion, sino pa esnan den necesidad na Aruba mes.

V/d Biezen ta gradici tur esnan cu a sostene e evento, en especial e mayornan, cu a siña e muchanan di chikito con pa yuda otro den necesidad. E ta algo bunita, e ta un gesto cu ta sali for di nan curason. Por ultimo v/d Biezen ta bisa un danki pa contribui na Aruba su unico Banco di Cuminda.