Mescos cu na añanan 2012 y 2016, e aña aki atrobe Racing Club Aruba, RCA di Solito, a bay cu e copa di campeon di Copa Betico, organisa pa Arubaanse Voetbal Bond (AVB). E final tabata contra SV Dakota. E wega a caba cu score di 3-1 na fabor di e tricolornan.
E ekipo di Solito RCA a titula campeon di Copa Betico cu a tuma luga den fin di siman den cuadro di celebracion di Dia di Betico. Arubaanse Voetbal Bond (AVB) tur aña ta organisa e torneo cortico aki. RCA a gana e final cu score di 3-1.
Richard Dijkhoff, presidente di AVB, a expresa cu e organisacion ta contento cu e torneo cu a trece un final clasico entre e muchanan di Solito y e Dakoteronan. E ta dos ekipo cu a yega di hunga e final na mas cu un ocasion den pasado y ta uno cu a trece hopi emocion bou di e fanaticonan. Ambos tribuna tabata completamente yen, Dakota pariba y RCA pabou, cu ta un bon forma pa clausura e celebracion di Dia di Betico.
“Tin hopi interes tur aña pa e torneo aki cu ta duna un prestigio na esun cu bay cu e trofeo. E hungadonan ta lucha te final pa logra pa logra haya e titulo. AVB ta sumamente contento cu e respaldo cu ta haya di e teamnan y ta duna e organisacion e empuhe pa sigui mehora pa e siguiente edicion di Copa Betico,” Dijkhoff a expresa.
Bay cu e titulo den un torneo semper ta un sentimento grandi,” Giovanni Thodé, director tecnico di SV RCA a expresa na final di wega. “Bo ta prepara p’e y ta bay tur wega pa gana y na final pa ricibi e copa ta algo hopi grandi,” el a bisa.
E golnan a wordo anota pa RCA: Ronald Gomez (4 min); Baromeo (14 min) y Diqion Ras (89). Pa Dakota a anota Joshua Gross.
Tres biaha campeon
Mescos cu na añanan 2012 y 2016, e aña aki atrobe Racing Club Aruba, RCA di Solito, a bay cu e copa di campeon di Copa Betico, organisa pa Arubaanse Voetbal Bond (AVB). E final tabata contra SV Dakota. E wega a caba cu score di 3-1 na fabor di e tricolornan.
RCA ta existi desde aña 1934 y a titula campeon di Aruba na varios ocasion. Ditto Acosta ta encabesa e organisacion deportivo, cu ta conta cu futbolistanan di edad hopi jong te na veteranonan. “Pabien RCA cu otro trofeo mas, pa confirma cu Boso ta un di e ekiponan miho prepara, bon organisa, disciplina y cu hopi talento futbolistico,” ta e mensahe cu e presidente a manda pa e team.
