Den fin di siman tras di lomba tabatin kontinuashon di e kampionato RBI Curaçao 2019 patrosiná prinsipalmente pa MCB i ku awor ta den e fase di dòbel eliminashon. Despues di un total di 7 wega tantu Marchena Reds, Firebirds Diamondbacks komo St. Michiel Astros a keda eliminá for di e aktual kampionato despues ku nan a pèrdè dos wega.

Van Engelen Giants ketu bai ta sigui dominá i den e buèlta importante aki ketu bai no a konosé derota. Giants a gana ámbos partido ku nan a hunga. Sobra otro tres ekipo ketu bai den kontienda, Royal Scorpions, Sta. Maria Pirates i Sta. Rosa Indians tin un wega pèrdí. Pa e fin di siman benidero lo korona e kampion di RBI 2019 divishon Senior. Indians lo trata na defendé nan título, Giants lo ta faborito pero Pirates i Scorpions lo no entrega fásil.

Pa loke ta e weganan den fin di siman tras di lomba, djasabra Sta. Rosa Indiana a gana Marchena Reds 6-5, Sta. Maria Pirates a gana Firebirds Diamondbacks 17-2, Van Engelen Giants a gana Royal Scorpions 10-1 i finalmente Sta. Rosa Indians a gana Sta. Maria Pirates 15-9. Ku e resultadonan ei djadumingu tabata krusial pa sobrebibensia di algun ekipo. Den e promé wega ayera, St. Michiel Astros a mira tur speransa bai pèrdí na momentu ku Sta. Maria Pirates a blankea nan ku skor di 6-0. Esaki tabata e di dos derota di Astros i asina ta keda eliminá for di RBI 2019. Picher ganador tabata Je-Andrick Lourens ku a bai e ruta kompleto sin permití hit. El a poncha 4 bateadó i duna 2 base por bola.

Picher pèrdèdó tabata Jediah Kwidama. Pirates tabatin 5 bateadó ku a bai di 2-1. Royal Scorpions a logra di bòns bek despues di nan derota djasabra ku un viktoria di 11-4 riba Marchena Reds ku asina tambe ta keda eliminá. Picher ganador tabata Jadon Gosepa miéntras ku vários bateadó di Scorpions a konektá 1 hit. Picher pèrdèdó tabata Roangeraud Fraai miéntras ku Sloop i Mingeli a bai di 2-1 pa Reds. Finalmente ayera Van Engelen Giants a gana Sta. Rosa Indians 11-1. Picher ganador tabata Shane Quant  i e mes a bai di 3-3 na bate ku 2 kareda empuhá. Picher pèrdèdó tabata Rajeev Klaber i Ostiana i Haswell a bai di 2-1 pa Indians.

Kampionato di RBI 2019 ta kulminá e fin di siman próksimo aki ku e 4 ekiponan, Giants, Scorpions, Pirates i Indians batayando pa e título di kampion. Van Engelen Giants ya ta den final djadumingu i lo sinta warda wak kua di e otro 3 ekiponan lo gana e bataya di eliminashon djasabra pa topa nan. E promé wega di eliminashon djasabra lo ta 9or di mainta entre Sta. Maria Pirates i Royal Scorpions na Tio Daou Ballpark. Ganador di e wega aki lo topa Sta. Rosa Indians pa 11:30 am.

E ganador di e wega final di djasabra lo pasa pa e gran final di djadumingu pa 10:00 am kontra di Giants ku ainda lo tin e luho di por pèrdè un wega. Si a kaso esei tuma lugá, e último wega desisivo lo inisiá pa 1or di mèrdia. RBI Curaçao 2019 ta kai bou di ouspisio di Curaçao Baseball Development Foundation (CBDF) i kampionato ta bou di maneho di Fundashon pa Nan. Danki un biaha mas na MCB pa ta spònser prinsipal, Hensley Meulens i por último KNBSB.

Comments

comments