RBC Aruba ta anuncia cu entusiasmo e lansamento di nan carchi di debito nobo di Visa, disponibel desde 24 di maart pa tur cliente personal, socio simpel y comerciante individual. Joanaila Geerman-Lacle, Branch Manager di RBC Aruba, a enfatisa e compromiso di e banco pa inverti den tecnologia moderno pa mehora experiencia di e clientenan.
E carchi nobo ta ofrece un serie di bentaha, incluyendo:
- Seguridad: Chip y PIN, pago “tap” sin contacto.
- Flexibilidad: Uzo local y internacional na ATM y sistema POS.
- Comodidad: Transaccionnan registra via email.
Pa obtene e carchi, e clientenan personal y e comerciantenan individual por bishita un sucursal di RBC durante oranan di oficina, di dialuna pa diabierna. Ta importante pa corda e siguiente:
- Clientenan casa mester menciona nan fam di soltera.
- Mester presenta un identificacion valido (ID, rijbewijs of paspoort) y prueba di adres (recibo di awa/coriente of papel di Censo no mas bieu cu 3 luna).
- Clientenan cu mester actualisa nan cuenta mester presenta dos identificacion.
- Tene cuenta cu e schema di orario y dia pa busca e carchi, segun alfabet.
RBC Aruba ta recorda clientenan cu nan carchi blauw existente lo keda desactiva na un dado momento segun e fecha di otorgamento di e carchi blanco, pues ta importante pa busca e carchi nobo na tempo. Pa mas informacion, bishita e website di RBC.
Loke ta trata e limitenan di transaccion, tin e siguiente:
- Por lanta te cu 2000 florin pa dia for di e cuenta.
- Cu mas di un cuenta te cu 4000 florin.
- Por swipe te cu 15.000 florin.
- Internacionalmente por lanta te cu 2000 dollar.
- Por swipe te cu 4000 dollar.
- Combinacion di lanta y swipe, ta keda 4000 dollar.
Clientenan por sigui uza nan carchi blauw pa cierto terminalnan POS cu no ta cla ainda p’e carchi nobo. RBC Aruba ta invita tur cliente pa bishita un sucursal pa haya tur detaye y busca nan carchi nobo mas pronto posibel pa por cuminsa disfruta di su facilidadnan avansa.
